Parlamentario Sonaly Fernandez Acosta ta entrega su asiento

ORANJESTAD – Despues di apenas 5 luna den funcion como parlamentario, Sra. Sonaly Fernandez Acosta a anuncia di sorpresa cu e ta retira como politico, y ta bay traha como consehero strategico di Minister di Asuntonan Social den Gabinete AVP/FUTURO entrante 1 di juni 2025. No ta conoci ken lo reemplaza sra Fernandez Acosta. 

HONOR

"Tabata sigur un gran honor di por a representa pueblo di Aruba como miembro di Parlamento. E experencia aki a duna mi hopi claridad riba e proceso parlamentario y e necesidadnan di nos comunidad. Tambe a pone mi refleha unda mi por contribui di un manera mas fuerte cu e pasion y experencia cu mi tin,” segun Sra. Fernandez Acosta.

DECISION PERSONAL

E transicion aki ta un decision personal basa riba Sonaly su motivacion principal pa drenta e arena politico. E mision, particularmente ta enfoca riba e sector di social, entre otro, sosten pa e gruponan di mas vulnerabel den nos sociedad. Den e encargo nobo, Sonaly lo por traha mas cerca y ehecuta cambionan cu tin impacto profundo riba nos comunidad. "Mi mision semper tabata pa trece cambio positivo unda e ta mas necesario. For di e encargo nobo aki, mi ta sinti cu mi por yega mas cerca di e realidad di nos comunidad y purba duna forma na solucion concreto" segun Sra. Fernandez Acosta. Sra. Fernandez Acosta ta gradici su coleganan den Parlamento y tur su votadonan cu a dun’e  nan sosten y confiansa. Sonaly lo sigui entrega su mes pa un Aruba mas husto y inclusivo cu e mesun pasion y dedicacion cu semper el a bin ta haci.