Croes: No a para labor (inspectie) di sali den grupo di taskforce

ORANJESTAD – Ningun momento (minister) a duna orden pa saca hendenan di departamento di labor for di e task force responsabel cu e inspeccion na e varios establecimentonan nocturno. Minister di labor Paul Croes a sigura NoticiaCla.com diahuebs cu ‘inspeccionnan lo continua! ‘Problema cu e mandatario tin, ta cu ‘algun control a bay poco onzorgvuldig’. “Pero no cu a para esaki di sosode”.

CONTROL TA CONTINUA

Ora cu NoticiaCla.com a haci e pregunta mas specifico, esta cu si e mandatario ‘no a para labor (inspectie) di sali den grupo di taskforce’, e mandatario a contesta “No. Controlnan lo continua”. Su tras e la bisa si, cu nan (control) lo continua ‘cu of sin taskforce’. Y finalmente e mandatario a bisa cu e conclusion ta cu ‘Departamento di Labor lo continua cu su controlnan. Na un forma ordena y corecto. Si ta den taskforce of no”.

CAMBIA OPERACION

For di basta dia tin informacion circulando cu e mandatario a ‘saca e parti di labor’ for di e team cu tabata subi caya y haci control. A cuestiona dado momento for di siman pasa, pakico a ‘cambia e operacion’, door di saca labor for di e team. For di e seno sindical a bin e mensahe cu ‘no ta compronde cu minister (Paul) Croes a bisa cu lo bay duna multa na dunadonan di trabou cu faya, pero cu a saca departamento di labor for di e task force. A cuminsa cuestiona e asunto, y a bisa cu ‘ta haya esaki straño’ y cu ‘mester tin un motibo’.

PRESENCIA DI MINISTER

Ora a bay investiga, a resulta cu supuestamente e taskforce a bay controla na un sitio di un comerciante ‘poderoso’ unda tabata presente esposa di e minister Croes, y unda cu e taskforce lo a hiba mas di un persona sera y despues deporta nan, pasobra e lo no tabatin su papelnan. NoticiaCla.com a puntra e mandatario riba e parti aki. Riba e asunto di su señora, e la declara cu ‘ami cu mi señora ta move tur caminda hunto. Pues si e tabatey, ami tambe” Croes a sigui bisa. Esey ta nifica cu e informacion no tabata corecto pasobra ningun di dos no tabatey. Y atrobe, e mandatario a desmenti cu e la ‘saca dept. di labor for di e team’. “Esey no a pasa”.