Detencion ex minister George Jamaloodin prolonga cu 2 dia

WILLEMSTAD – Ex minister George Jamaloodin su detencion a wordo prolonga cu dos dia. Esaki a keda confirma diahuebs atardi pa vocero di Ministerio Publico Norman Serphos. Si ta necesario, Jamaloodin lo wordo presenta dilanti di hues comisario diabierna 25 di juli, cu lo mester evalua e legalidad di e detencion y e encarselacion di su persona. Mirando e situacion di e caso, a pone condicion riba Jamaloodin. E no por tin contacto cu ningun persona cu no ta su abogado.

Manera cu NoticiaCla a raporta den forma di primicia, diahuebs marduga a detene e ex mandatario den un compleho di apartamento den becindario di Ser’I Lora. E ta relaciona cu e caso Maximum, cu ta trata e investigacion na e culpabel nan riba e morto di Helmin Wiels. Riba orden di fiscal y dos hues comisario, a tuma haci varios ‘inval’ na entre otro e apartamento unda cu a detene Jamaloodin, y tambe 2 otro cas, respectivamente Steenrijk y Steenen Koraal. A haci inval tambe na un hotel den centro di ciudad y un negoshi na Saliña. Na varios di e lugarnan aki, a tuma articulo den beslag cu ta importante pa e investigacion.