Resultado di eleccion hopi preta na Surnam entre partido na mando y oposicion

PARAMARIBO - E conteo di voto na Surnam ta den full swing. El a bira un resultado hopi preta  entre e Partido di Reforma Progresista (VHP) di Presidente Santokhi y e partido di oposicion mas grandi: e Partido Nacional Democratico (NDP) di Jenny Simons. Despues di a conta mas cu 90 porciento di e votonan, NDP tin un bentaha di un asiento riba VHP: 18 pa 17.

Jenny Simons di 71 aña ta e lider di NDP. E ta un ex dokter, político y tabata presidente di parlamento di Surnam pa dies aña. Ela susede Desi Bouterse, e exlider di ehercito y fundado di e partido. El a muri na december, evitando asina su castigo di bida largo pa e asesinatonan di december. Den su campaña, Simons a indica cu e kier traha su mes rumbo, cu no ta mescos cu esun di Bouterse. Sinembargo, no tin unanimidad completo tokante esaki denter di su partido.

Ayera, alrededor di 400.000 Surnameño a haya permiso pa vota pa un parlamento nobo. E Presidente ta wordo eligi despues di e instalacion di Parlamento cu un mayoria di dos tercera parti, of 34 di e 51 asientonan. Ainda no ta cla ken lo bira presidente. Varios candidato tambe ta popular den partidonan. Por ehempel, ex vice presidente bou di Bouterse y number dos riba e lista di NDP, Ashwin Adhin, tambe ke bira presidente.