Declaracion di parlamentario riba Venezuela a causa sorpresa

ORANJESTAD – E hecho cu parlamentario Glenbert Croes a mustra su sosten di solidaridad cu Venezuela, riba e disputa teritorial cu e Guyana, a causa consternacion serca oficialnan diplomatico y ministerial. Mientras cu di parti di departamento di relacionnan exterior no ta dunando comentario, riba e twitter account di e minister plenipotenciario di Aruba na Hulanda, Alfonso Boekhoudt pa medio di su twitter account,  a reacciona cu asombro riba e acto aki awe mainta. No ta prome biaha cu Croes ta declara algo, cu ta crea un ‘issue’ cu por bira un problema diplomatico. For di experiencia ta conoci cu e departamento diplomatico ta pidi semper pa ‘abstene’ di duna cierto comentarionan, pasobra e por implica nos pais sin cu nos kier.

ENTREVISTA

Tabata den un entrevista na e programa Hoy en Contexto na ANTV, e parlamentario a señala cu e compleho situacion por ta e foco di un problema regional mas grandi. Ademas Croes a sigui declara cu Aruba y Venezuela ta dos pais ruman, cu ta pone cu cualkier situacion arma den e revolucion bolivariana, pro tin repercucion negativo cu e pais bisiña.

SOLIDARIDAD

“Na nomber di nos pueblo, nos ta solidarisa nos mes cu Venezuela riba e conflicto teritorial riba e ‘Esequibo” Croes a declara. “Nos no ta bay permiti cu nos isla ta bira teritorio di provocacion”. Ademas a mustra admiracion pa e postura contundente cu presidente Nicolas Maduro a asumi riba e tema aki.