Bus cu a kima, a keur dos siman pasa ainda cu exito

ORANJESTAD – E bus di Arubus cu a kima completamente ayera, apenas dos siman prome a caba di wordo gekeurd, y pasa esaki sin problema. Vocero di Arubus, Sanin Daou awe mainta a splica NoticiaCla.com esaki basa riba rumornan cu ta pa falta di mantenimento e candela a sosode. Mientrastanto, Daou a sigura cu e motibonan exacto di e candela no ta conoci y un investigacion rigoroso lo tin cu saca afo kico a causa e candela repentino ayera.

SERVICIO DI E BUS

Varios parti di e bus a wordo cambia dos siman pasa, incluyendo brakes y diferencial. “Parti mantencion y keuring di e bus tabata den perfecto bon condicion. Tur cos patras den e bus, -unda cu e candela a cuminsa-, tabata nobo. “Si tabatin un problema eynan dos siman pasa, e lo no a pasa su keurmento” Daou a sigura e website aki.

KICO A SOSODE

Manera ta conoci ayera den dia un bus bayendo Playa, na altura di La Granga na Savaneta. Ora cu e pasahero tabata bahando pa busca un pasahero, e la brake, baha caminda y e ora e la para , a tende un explosion y un candela a cuminsa. For di splicacion di e chauffeur, por deduci cu ta e tire patras parti paden a rementa. E candela a cuminsa na e parti patras na e tire aden, aunke no ta conoci kico a causa e candela. Un chauffeur den un otro bus di Arubus bayendo San Nicolas e momento ey a para, y purba yuda su colega pa combati e candela. Lamentablemente esaki no a logra, cu a pone cu e bus a kima manera cu e la kima.