Na Hulanda a haya curpanan di hobenan perdi Jeffrey y Emma y nan tata

WINSCHOTEN - E curpanan haya ayera den un auto den awa na Winschoten ta esnan di Jeffrey y Emma desapareci y nan tata. Polis a confirma esaki. “Shock, rabia y profundamente tristo. Ningun palabra ta yega cerca di loke nos ta sintiendo awor,” e familiarnan a bisa den un comunicado. “Nos no por realis’é y en realidad nos no kier realis’é.”

Den e ultimo dianan, polis a bin ta buscando na varios luga den e provincia di Groningen pa Jeffrey di 10 aña yi Emma di 8 aña, kendenan ta perdí for di diasabra. Nan a wordo hiba den un auto pa nan tata e dia ey. Segun polis, tabatin indicacion cu e kier a mata su mes y e muchanan. E auto, un Toyota Avensis color gris, a wordo mira pa ultimo biaha diasabra pa 3:45 PM den area di e A7 banda di Winschoten. Ayera nochi e auto cu tres curpa den dje a wordo haya den Rensel, un canal na Winschoten, banda di A7. E vehiculo a wordo hisa for di awa cu un grua den careda di mey anochi.