Oduber: Partidó nan di voucher pa estadia, tin permiso pa opera

ORANJESTAD – E supuesto operadornan venezolano cu lo tabata partiendo voucher ilegalmente pa estadia na Aruba, a resulta di tin permiso di operacion. Minister di turismo Otmar Oduber a confirma na NoticiaCla.com diaranson cu esaki ta e caso, pero cu toch lo controla nan pa cualkier eventualidad. “Pues e parti di man duro, ta sigui si” Oduber a bisa, y lo usa e man duro pa controla e cantidad chikito cu ta opera e tipo di operacionnan aki. Lo haci control riba e establecimentonan aki, pa wak si enberdad nan ta cargando nan permisonan necesario pa opera sea un permiso di lodging of un permiso di hotel.

CONTROL

Segun Oduber, mester controla esaki pa evita cu e companianan chikito aki, burla di e sistema di permiso a base fiscal. A splica cu ora cu bisa cu no ta opera como un hotel of un lodging, ta paga un tarifa mas chikito na impuesto, manera BBO of BAZV di 3 1.2%. Si resulta cu ta un operacion cu ta cuadra cu un operacion hotelero, aunke chikito, bo tin cu paga e suma di 9.5% como contribuyente na economia di Aruba y caha di turismo.

NEGOSHI

E ta sigura cu no ta nenga ningun negoshi di opera. A resulta cu e compania cu tabatin flyer, ta un compania cu ta registra na camara di comercio, y tin un contract cu e compania cu ta haci propaganda na aeropuerto. “Pues e ta un proceso masha normal. Nada di ilegalidad cu esey” Oduber a sigui bisa.

E PROBLEMA ORIGINAL

Tabata apenas dos dia pasa cu NoticiaCla.com a raporta cu un grupo di persona, -no ta conoci si nan ta local of Latino-, lo ta partiendo flyer na aeropuerto, y cu informacion inicial tabata cu nan lo ta actuando illegal y lo wordo atendi cune corectamente. Asina minister di transporte y turismo Otmar Oduber a reacciona serca NoticiaCla.com dialuna anochi. E personanan aki lo tabata ofrece turistanan cu yega Aruba, un flyer na Spaño, ofreciendo nan hospedaje y transporte na prijs di baca flaco (entre 15 pa 25 dollar pa dia) y tambe transporte. Aeropuerto y polis a haya orden pa actua y kita e grupo operando, for di e.o. aeropuerto.

ARUBA Y VENEZUELA

For di investigacion cu NoticiaCla.com a haci, ta sali afo cu e operacion aki prome tabata sosode solamente na Venezuela. Hendenan tabata wordo ofrece e oportunidad pa biaha pa Aruba, haya hospeda y transporte pa dia, pa un prijs hopi hopi abou. Nan por a paga te hasta na bolivar si ta necesario. Tur loke nan mester a haci, ta comunica cu un number (via whatsapp), of manda email pa un ‘hostel’, y nan lo a wordo contacta. Fuera di esey, tin dos number di telefon cu ta aparece riba e dos flyernan diferente.

REACCION ATA

A tuma contacto cu directora di Aruba Tourism Authority, Ronella Tjin-Asjoe cu a confirma e operacion aki. Loke e no tabata sa sinembargo, ta cu e operacion ta activo tambe te hasta na Aruba, -y mas peor-, tereno di aeropuerto. Turistanan cu aparencia Latino, apenas nan sali for di e sala di yegada, ta wordo confronta cu e persona cu ta entrega nan un flyer. Te cu ayera ainda e operacion aki tabata tuma lugar. E website aki a compronde cu te hasta ta laga stapel di e flyernan aki riba cierto bali den aeropuerto mes. Pues hendenan mes por tin acceso na e flyer aki.

NO ACEPTABEL

Segun Tjin-Asjoe, e la sigura e website aki cu e operacion aki ‘no ta aceptabel’. E directora a sigura cu for di siman pasa nan a informa y acerca autoridad pa wak ‘con pa pone un paro na esaki’. Mes momento nan mes como ATA lo ataca esaki. Segun e directora, nan a wordo poni na altura di esaki luna pasa y cu e informacion (flyer) ta aparece na Venezuela so. Pero pa nan sorpresa, awor na ta confronta cu e flyer ta wordo parti na Aruba tambe. Tin te hasta hotelnan unda cu turistanan ta haya esaki pega riba nan auto y cu e ta wordo reparti na aeropuerto.

REACCION MINISTER

NoticiaCla.com a compronde for di minister Oduber, cu e la papia cu aeropuerto su director Jim Fazio awe. “Nan ta activa full nan security, pa sigura cu e hendenan aki, cu ta riba tereno di aeropuerto, no parti e cosnan aki mas”. A bisa tambe cu lo envolvi polis si ta necesario y lo kita tur e hendenan aki for di tereno si nan ta partiendo e flyer y ta wordo gara ta parti e flyer. “Di parti di ATA, a aserca SIA, esta belastingdienst pa tackle y bay cu cuater pata (organisacionnan envolvi) contra e tipo di advertencia aki cu ta tuma lugar, cu man duro”, e mandatario a sigura NoticiaCla.com dialuna anochi.