Fazzio: Toren di control di aeropuerto cu cambio moderno

ORANJESTAD – Si tur cos ta bon, aki un luna y mei, aeropuerto lo inicia e proceso pa renoba e toren di control. Entre e partinan cu lo mester wordo renoba ta upgrading di e sistema di candela, rehabilita e bentananan y e structura. Segun e CEO di nos aeropuerto, Jim Fazzio, e toren ta un edificio bieu y ta den necesidad pa wordo cambia. “Mes momento e ta un bon oportunidad pa cambia e parti exterior di e edificio” Fazzio a bisa, indicando cu e lo mustra mas moderno ora e trabounan keda completa.

DISEÑO

A diseña algo cu ta laga e toren mantene su ‘originalidad’ pero toch cu un toke moderno. Entre nan, algun panel di fiberglass, cu lo duna e toren un fachada mas ‘artistico’, hunto cu e sistema di luz. “Por pensa manera e forma cu por luci e toren den diferente color, segun e temporada of actividadnan festivo na Aruba”.

DEN OPERACION

Haciendo un trabou asina no ta facil, mirando cu e toren ta den operacion tur dia. “E ta un reto enberdad” Fazzio a sigui bisa. Pero e renovacion no ta dje dramatico ey. Como tal ta mantene e lift y e trapi pa e toren habri tur tempo. E toren mes lo no wordo ‘afecta’. Pero e break room y e otro cosnan manera bentana di e toren, mester wordo haci durante orario fuera di trabou pa no stroba e operacion.