Nuboer: Ruta Sto Domingo tabata dificil pa cuminsa pero necesario

ORANJESTAD – E destinacion Santo Domingo cu InselAir Aruba a cuminsa bula diaranson, ta un di esnan mas dificil cu a persigui. A tarda e compania aereo casi 2 aña pa logra keda cla cu tur e permiso, papeleo y logistica pa porfin por a cuminsa bula. “E no tabata facil”, CEO di InselAir Aruba, Frederick Nuboer a confia NoticiaCla.com. E ta un ruta conoci, uza den pasado caba pa otronan, incluyendo Insel Air International. Pero pa Aruba, e ta un ruta ‘nobo’ cu ta conecta Aruba cu Sto Domingo y St Maarten.

REKISITO

E rekisito cu e autoridad di Sto Domingo ta exigi ta hopi halto. Tin hopi fase cu mester pasa door di dje prome cu haya e derecho. E prome tabata e asina yama ‘vestigings vergunning’, osea e permiso economico pa por opera localmente. E ta un permiso cu mester wordo firma pa nada menos cu e presidente di e pais mes, y esey ta tarda semper. “Esey a tuma varios luna prome cu el a firma e permiso pa nos por a establece nos mes economicamente aki na e pais”.

DEPARTAMENTO AVIACION CIVIL

Despues tabatin e fase di JAC, cu ta e Junta di Aviacion Civil, cu ta manera un Directie Luchtvaart di Aruba. Aki mester a manda tur papel entre Aruba y Sto Domingo. Ta sigui e parti mas tecnico operacional pa loke ta e avionnan, y tipo di entrenamento cu e personal di e compania ta duna. Tambe tin e fase cu ta un otro departamento basa totalmente riba seguridad. Mester traduci henter e manual na Spaño, mientras cu Aruba tine na ingles.

LOGRO

Na tur, un sin fin di cos cu a pone cu dado momento a cuminsa bin Sto Domingo pa splica e autoridadnan kico ta pasando y con e manera di Aruba ta di traha. “Pero finalmente e la logra toch” Nuboer a bisa cu su sonrisa di semper. Un comienso di augustus 2013, pa awor na juli 2015. Pues casi dos aña.

MAS BUELO?

Mientras cu tin un comunidad dominicano indigena basta grandi na Aruba, lo a pensa cu ta habri cu mas cu e 2 buelonan pa siman cu tin aworaki. Pero Nuboer a splica cu un ruta ta cuminsa regularmente cu 2 frecuencia (dos biaha) pa siman. Ta cuminsa ‘slow’, cu e Fokker 70 ta cu un avion relativamente chikito unda cu por incrementa e cantidad di pasahero segun tempo pasa. Ta mustrando cu lo cuminsa incrementa basta lihe. Ta cuminsa incrementa prome cu frecuencia, y ta premira cu e frecuencia lo aumenta te na 3 pa 4 biaha pa siman. Ta mira tambe cu durante temporada halto lo por uza e ekipo diferente manera un MD-80, cu ta trafica 152 pasahero, compara cu e 80 pasahero cu e Fokker 70 por trafica awor.

ST MAARTEN

E hecho cu a opta pa combina dos destinacion, (Sto Domingo y St Maarten) ta pasobra a haci investigacion cu a demostra cu e demanda (ainda) pa St Maarten no ta suficiente fuerte pa hustifica un buelo directo pa St Maarten so. Pesey a opta pa combina e destinacionnan aki, segun Nuboer. Corsou ta haciendo e operacion aworaki directo pa St Maarten. Esey no ta nifica cu ora cu tin temporada special, cu por cambia esaki y pone un ruta ‘adicional’.