A re-establece orden den prizon na St Maarten despues di candela

PHILIPSURG - Ayera tardi, algu despues di 5or prizòn Point Blanche na St. Maarten a bati alarma pa kandela. Un parti di e prizòn a keda sendé na kandela. E kandela a bira unu grandi i ta basta huma pretu tabata sali for di e instituto penitensiaro.

Kuerpo polisial di St. Maarten mesora a atendé e situashon serio i peligroso ku a surgi den prizòn. Polis a indiká ku huntu ku otro servisionan di emergensia dje isla ta den prizòn pa atendé e situashon ku a surgi i pa mantené órden den e instituto penitensiario. Tambe e kuerpo a haña sosten adishonal di otro servisionan di emergensia riba e pais, p’asina trata di stabilisá e situashon e momentu ei den prizòn. Debí na e kandela, outoridatnan polisial mester a sera Ground Dove Road, ku ta e kaya ku ta kondusí pa e prizòn.

MINISTER DI HUSTISIA: Ayera nochi Minister di hustisia, sra. Nathalie Tacking, a anunsiá ku e tabatin un reunion di krísis ku liderazgo di Kuerpo Polisial relashoná ku e situashon na prizòn. E Unidatnan di Emergensia ku ta brantwer, ambulans, kuerpo polisial, VKS, i Marechaussee tur a bai prizòn, kaminda mas lat a restablesé órden i seguridat di tur prezu den kareda di 6or di atardi.

Minister Tacking mes a bishitá e prizòn pa ta na altura kiko a pasa. El a indiká ku tres prezu a haña kemadura no di gravedat ku a keda tratá den prizòn mes. Ademas e minister a pidi asistensia militar pa seguridat i mantenshon di órden den prizòn. Mas aleu minister a bisa ku seguridat públiko, e staf di prizòn i detenidonan ta nan prioridat na promé lugá. Lo no tolerá tipo di aktonan i nan ta tumando tur medida nesesario.

KORSOU YUDANSA: Paisnan di den Reino tin un akuerdo pa yuda otro den kaso di emergensia. Relashoná ku e situashon na St. Maarten, minister di hustisia, sr. Shalten Hato, a indiká riba pregunta di EXTRA, ku Kòrsou a haña petishon pa yuda ku órden den e prizòn na St. Maarten. Kòrsou ta riba “standby” pa duna eventual asistensia. Te ainda e no a haña petishon pa Kòrsou por aloká prezunan di St. Maarten, dor di posibel daño dje kandela. NOTA: Texto ta scirbi den papiamento fonetico di Corsou.