Gobierno a yama cadena Hilton ‘welcome back’ na Aruba

ORANJESTAD – E mandatario a considera e acto simbolico di kita nomber di Raddison Resort for di e edificio como algo hopi special. Manera ta conoci diaranson mainta trempan, a cuminsa e proceso pa kita e nomber, y inicia asina un era nobo pa e loke nos a semper considera como e ‘gran dame’ riba e strip di palm beach.

COMPANIA LOCAL

E mandatario ta contento cu e desaroyo y cu awe un compania ta tuma over cu ‘no ta all inclusive’, sino un compania local cu lo opera e hotel estilo EP (European Plan). Tin un hotel cu ta mantene tur su empleadonan, y no tin cu manda hende cas pasobra no tin casino. E ta un compania cu tin fondo di Aruba, contrario na placa cu ta wordo ‘belegt’ den exterior, y ta laga e placa na Aruba. Tambe e parti importante cu ta yama Hilton un ‘welcome back’ entrante diaranson merdia.

VARIOS FASE

Lo tin varios fase cu e hotel lo pasa aden, cu ta varia di renobacion, expansion pa finalmente pone e nomber di Hilton riba e edificio. E mandatario a gradici tur esnan envolvi den e proyecto, y a mustra cu gobierno ta salvaguardia e bienestar general di Aruba.