Hilton Hotels & Resorts a re-introduci su mes na Aruba awe

ORANJESTAD – Diaranson merdia Hilton Hotels & Resorts, e cadena mas conoci di e compania Hilton Worldwide a anuncia inauguracion di Hilton Aruba Caribbean Resort & Casino como e hotel di mas nobo den su portofolio di Caribe. Esaki sigur ta un simbolo di orguyo pa e comunidad local como cu awe e hotel ta propiedad di Aruba Growth Fund (cu ta representa e fondonan di pensioen di mas grandi di nos isla) y su partnernan, y ta wordo maneha pa Hilton Worldwide, e lidernan mundial den e industria di hospitalidad.

ISLA PERFECTO

“Aruba ta e isla perfecto den Caribe, cu influencianan Europeo, playanan blanco y bunita y cu un escena culinario extensivo,” tawata palabra nan di Rob Palleschi, Global Head di Full Service Brands na Hilton Worldwide. “Como un di e destinacionan cu ta wordo mas frecuenta y como e isla cu tin e cantidad di mas grandi di bishitantenan cu ta bolbe aña tras di aña, e apertura aki ta marca un logro importante pa nos mientras cu nos ta sigui expande nos presencia global y cumpli cu nos compromiso esta ofrece experencia nan diferente na nos clientenan.”

HISTORIA REMARKABLE

Cu un historia y herencia remarkable, e hotel cu originalmente tawata carga e nomber di Aruba Caribbean Hotel, tawata e prome hotel di luho cu a habri na Aruba na aña 1959, situa na un di e partinan mas bunita na Palm Beach. E hotel a wordo diseña pa Morris Lapidus, un arcitecto renombra, cu tawata e diseñador di un cantidad di hotel famoso na Miami, y tambe El Condado Plaza Hilton y Doubletree by Hilton Metropolitan na New York City. E “Grande Dame” manera cariñosamente e ta wordo yama, tawata tin diferente nomber durante casi seis decada pero su tradicion y compromiso cu e isla semper a keda intacto. E nomber nobo esta Hilton Aruba Caribbean Hotel & Casino ta rindi honor y ta duna balor na e leyenda di e hotel ariba nos isla.

RENE KAN

Rene Kan, socio di Aruba Growth Fund a bisa “Como un fondo di inversion Arubano cu ta representa miles di nos habitantenan, nos ta sumamente orguyoso di trece e prome high-rise hotel di Aruba bek den man di nos hendenan. Hunto cu e personal experencia y Hilton Worldwide, nos obhetivo ta pa haci e hotel nobo un showcase di e hospitalidad Arubano pa nos clientenan internacional y e luga preferi di nos localnan. E ‘Aruba Caribbean’ ta bek!”

APERTURA

“E apertura di Hilton Aruba Caribbean Resort & Casino ta wordo celebra cu hopi orguyo,” Tom Potter, Senior Vice President di Caribe, Mexico y Latino America di Hilton Worldwide a expresa. “E proyecto aki ta un adicion magnifico na nos portfolio di Caribe. E historia di e propiedad hunto cu e miembronan excepcional di e ekipo, ta den harmonia cu e cultura di hospitalidad di Aruba. Nos ta super agradecido pa e oportunidad pa ta parti di e comunidad aki y nos ta extende un caluroso bon bini di parti di Hilton na e pueblo di Aruba y na e bishitantenan di e isla”.

PLAN DI CELEBRACION

Pa celebra e inauguracion di Hilton Aruba Caribbean Resort & Casino, tin un cantidad di actividad plania na honor di e ekipo cu ta haci e propiedad uno excepcional door di brinda experencianan inolvidabel na tur e bishitantenan.