Dowers: Comienso otro luna rijbewijs nobo ta cla

ORANJESTAD – Si tur cos ta bon, pa 1 di Augustus e rijbewijs ‘nobo’ lo keda cla. Asina e mandatario di husticia Arthur Dowers a declara na Bon Dia Aruba awe mainta. Cu esaki e problema di rijbewijs lo pasa pa pasado, e mandatario ta spera. A mustra cu e intencion ta pa e documento nobo keda cla e siman aki mes. Nan lo bin cu un ‘parecido na esun bieu y esey lo bira un documento reconoci internacionalmente.

MEGA FRAUDE

E mandatario a recorda cu nan a bin cu e cambio aki despues cu a wordo presenta un “mega fraude” cu rijbewijs. A rais di esaki a dicidi di saca e rijbewijs completamente for di pais Aruba y nan a laga pa produci na Hulanda. Pero a surgi problema di tardansa pa diferente motibo y esaki a trece un mal contento. E ora a dicidi pa bin cu un rijbewijs nobo, pero mirando cu e ta un documento compleho cu hopi elemento di siguridad, nos mes na Aruba no por produci. Nan ta bay print esaki na Aruba, pero e lo wordo produci afo bou regla stricto di siguridad internacional na Merca.

CARTA DI GARANTIA

Igualmente e mandatario a laga sa cu e hende cu ta bay core auto den exterior, nan a yega di duna informacion cu esunnan cu a solicita un rijbewijs temporal mester di un rijbewijs inter nacional. Minister Dowers a bisa cu tin caminda na Merca cu ta acepta e rijbewijs aki, y tin otro cu no, ya cu e ta na Hulandes.

Pa evita e tipo di inconveniente aki, nan ta dunando un carta adicional na Ingles, tambe na Hulandes, cu ta splica cu esaki ta un rijbewijs oficial di pais Aruba y cu por wordo uza.

RIJBEWIJS

Considerando cu esun nobo ta na caminda, esun temporal no ta wordo duna mas. E persona cu mester un rijbewijs por haya un declaracion for di e departamento di rijbewijs cu e number y fecha cu nan a ricibi e rijbewijs cu ta caduca, y e ora nan ta haya un rijbewijs internacional hunto cu e carta oficial cu ta garantisa cu e documento aki ta uno oficial di nos pais.

ACEPTACION INTERNACIONAL

Minister Dowers a afirma cu informacion cu nan a ricibi ta indica cu e rijbewijs internacional en cuestion no ta wordo acepta den cierto caminda. E ta consciente cu esaki por trece cierto inconveniencia. E ta lamenta cu ainda ta surgi e tipo di inconveniente aki, ya cu algun luna pasa el a duna instruccion pa soluciona e tipo di problema aki caba. P’esey a wordo introduci un carta adicional pa purba di soluciona e tipo di inconveniente aki, principalmente den e temporada aki cu hopi hende ta bay disfruta di nan vakantie afo, y nan ta huur auto.

E mandatario a bisa cu segun informacion cu e hefe di departamento di rijbewijs mes a duna su persona, ta indica cu tur hende interesa di haya informacion of documento cu nan mester pa biaha, por pasa libremente na e departamento menciona.