Majoor John Maduro na timon temporalmente na KIA

ORANJESTAD – Te ora cu un management team (MT) nobo keda instala, majoor John Maduro lo fungi na cabez di Korrectie Instituut Aruba. For di momento cu Trudy Hassell a retira ‘abruptamente’ di KIA, minister a informa cu e siguientenan den orden lo sigui cu e maneho diario di e instituto penitenciaria. Pero no a menciona nomber. Awe ta resulta cu Maduro ta e persona cu tin e timon temporal.

PRESONAN PENDIENTE

Ademas, informacion cu e website aki tin, ta cu e presonan ta pendiente e pasonan siguiente den ‘leiding’ nobo di KIA. A compronde cu nan ta trankil y ta wardando pa wak kico ta sosode awor y ken ta bin na mando. Mas importante, nan ta wardando pa wak kico e cambionan ta cu lo wordo implementa awor cu nan instala un MT nobo.

MALCONTENTO

Recientemente un preso cu a comunica cu prensa, a bisa publicamente cu nan no ta nada contento cu e baymento di Hassell, ya cu e la haci hopi cos bon pa nan den apenas 6 luna. Pero ya caba a sinti e cambionan awor cu Hassell a bay, den apenas un siman y mei. E la sigura cu e ta papia pa mas di mitar di e presonan y cu nan tabata ‘hopi contento’ cu e trabou cu Hassell a desplega den su periodo cortico como hefe. NOTA: E persona mei mei den e potret, ta majoor John Maduro durante su combersacion cu minister Arthur Dowers di husticia, ora cu e mandatario a bishita KIA siman pasa.