BZK: Aruba a ‘priminti’ di keda cla na tempo cu ley di CAFT

DEN HAAG – “(Gobierno di) Aruba a sigura nos cu e fecha (di 1 augustus proximo) lo wordo alcansa”. Asina e vocero di oficina di minister Plasterk, Julia Rademaker a sigura NoticiaCla.com awe mainta. Riba e pregunta kico ta pasa si Aruba no logra, a referi nos bek na e acuerdo sera dia 2 di mei cu ta bisa cu “gobierno di Aruba lo percura cu e ley Financieel Toezicht lo drenta na vigor mas tarda 1 di augustus 2015”. Esaki ta nifica cu cualkier violacion di e acuerdo aki, Hulanda lo actua conforme e mesun protocol firma.

NO TA PROLONGA FECHA

Mes momento otro fuentenan na Hulanda a informa cu Hulanda a laga sa caba cu ‘lo no prolonga e fecha aki’, si Aruba pidi esaki. Esaki, mirando cu tin tur indicacion cu e fecha lo no por wordo alcansa debi cu tin un retraso pa loke ta su preparacion. Hulanda tabata basta indigna y a confirma esaki algun tempo pasa na NoticiaCla.com, cu e hecho cu ‘pa 6 siman largo’ casi, Aruba no a ‘haci nada’. Mirando cu e fecha ta yegando y cu por sosode cu Aruba no por cumpli, tabatin indicacion cu lo a pidi un extension. Algo cu Hulanda a sigura cu lo no sosode. E contesta di awe mainta, un biaha mas ta fortifica esaki. Ora cu e website a puntra specificamente kico ta pasa si e fecha aki vence sin cu e ley a pasa, a wordo referi na e ‘palabracion di e protocol’ y e ‘promesa cu Aruba a haci’. Pues no tin otro contesta y alternativa. Of ta cumpli, of ta wanta e consecuencianan.

PARLAMENTO NO A RICIBI NADA AINDA

Mientrastanto, faltando algo mas cu 2 siman pa 1 augustus, te cu ayera nochi, e ley ainda no a yega parlamento. Esaki e website aki a haya confirma. Informacion cu e website aki tin, ta cu e ley ainda ta na Raad van Advies (RvA) y cu mas probable, comienso di otro siman, e ley lo ta bek den ‘seno di gobierno’. Despues gobierno mester adapta esaki basa riba e consehonan di RvA . Unabes cu esey ta cla, e ley lo por sigui pa parlamento. Ta na e momento ey, lo por ‘planea algo’ pa tratamento. Lo trata e ley prome den comision central, pa despues di algun dia, trate den un reunion publico. Mirando e fecha, esaki lo nifica cu posiblemente e lo por keda cla ‘net net’ na tempo, si no tin mucho contratiempo.

REKISITO DI LEY

Ta keda tambe e pregunta si gobierno di Aruba adapta e ley segun consehonan di RvA cu a mustra caba un biaha cu e ley no ta cumpli cu e rekisitonan segun palabracion di e protocol. Pesey tabatin un tardansa, ya cu e ley a wordo manda bek algun biaha caba. Directie Wetgeving a confirma na NoticiaCla.com algun tempo cu enberdad e ley a bin bek pa nan, pa ahusta esaki, ya cu Hulanda no tabata contento cu e contenido inicial. Mientrastanto, Hulanda ta sinta warda trankil riba e fecha y wak si Aruba ta cumpli.