- AWSS: Medio mei por sinti e efecto nan positivo di e cambio na Bubali su planta
- Caso di Mike de Meza contra DIMP ta fin di mei awor!
- Na Corsou, Gobernador a huramenta Parlamento nobo
- Premier Schoof impresiona cu empresario Kock na Aruba
- Eman: Autosuficiencia y resiliencia Arubano a sobresali durante bishita di premier Dick Schoof
AOGX: Den di tres cuartaal di 2026 ta dicidi si ta bora pa hidrocarbon rond Aruba
ORANJESTAD - No ta spera ningun actividad pa bora un pos offshore di Aruba prome cu e di tres kwartaal di 2026, segun e compania Andicuri Oil & Gas Exploration VBA (AOGX) a bisa diaranson atardi. Tabata durante e reunion cu minister di Energia interino Arthur Dowers a topa cu Armstrong y CAP pa discuti e progreso di e proyecto di exploracion den area marino di Aruba
ANALISANDO DATA
Bill Armstrong, Presidente y CEO di Armstrong Oil & Gas, a splica cu un compania subsidiario di Armstrong, esta Andicuri Oil & Gas Exploration VBA (AOGX), ta actualmente analisando, reprocesando y interpretando tur dato geologico y geofisico existente den e area marino di Aruba. E analisis completo ta tuma mas o menos 12 pa 15 luna mas, prome cu por tuma un decision y informa tocante si y na unda lo ta miho pa bora un pos exploratorio. Pa es motibo, no ta spera ningun actividad pa bora un pos offshore di Aruba prome cu e di tres kwartaal di 2026. AOGX tin plannan pa haci estudio specifico tocante e impacto riba medio ambiente prome cu cualkier actividad na Aruba, sigui e miho practicanan y standard di e industria, mientras cu ta inclui e comunidad y participantenan Arubano.
HISTORIA LARGO
Armstrong tin un historia largo den operacion na Alaska, unda nan a participa of opera den casi 50 pos tanto na tera como den awa, logrando un record sobresaliente den HSE y protecion ambiental den un di e habitatnan natural mas proteha di mundo. Armstrong su meta ta pa mantene e mesun record den HSE y protecion ambiental na Aruba.
POTENCIAL DI HIDROCARBON
“Nos ta hopi entusiasma tocante e potencial di hidrocarbon di Aruba su area marino,” Bill Armstrong a bisa. “Nos ta hopi positivo, y nos lo kier replica e exito cu nos a obtene na Alaska akinan na Aruba tambe. Si nos exploracion ta resulta exitoso, Aruba por haña beneficionan grandi cu por stimula e economia di e pais cu impacto macroeconomico positivo y dunando ingreso significante.”
Jeremy Croes, Director di CAP, a agrega: “Si e proyecto ta exitoso, Aruba lo por logra independencia energetico usando un fuente di energia local, mas limpi y barata, ademas e lo por trece un reducion significante den gasto di energia y coriente pa e comunidad.”
AOGX a firma un “Production Sharing Contract” (PSC) cu CAP den 2024 pa exploracion, desaroyo y producion di hidrocarbon den e area marino di Aruba. E contract ta cubri un area di 14,356 kilometer cuadra. Armstrong y su afiliadonan tambe tin mas di 650,000 acre den licensia di exploracion na Alaska, caminda nan a descubri algun campo grandi di petroleo tanto na tera como den awa, cu e mas recien e Sockeye pos, cu a complete apenas algun siman pasa.
Eman: Autosuficiencia y resiliencia Arubano a sobresali durante bishita di premier Dick Schoof
ORANJESTAD - Diasabra atardi, Prome Minister di Aruba, mr. Mike Eman, a ricibi cu honor su homologo Hulandes, Prome Minister Dick Schoof, na su oficina na Cocolishi pa un reunion formal y strategico. Durante e reunion cu henter conseho di minister a dialoga riba e lasonan politico y di cooperacion entre Aruba y Hulanda.
Bishita di Schoof na hospital: Pashentnan indocumenta ta peso enorme riba fondo di HOH
ORANJESTAD - Como parti di e bishita di trabao di Prome Minister di Hulanda Dick Schoof diadomingo mainta, Minister di Salud Publico Drs. Mervin Wyatt-Ras, a compaña Premier Schoof den un bishita na Hospital Horacio Oduber (HOH). Jacco Vroegop, Director di HOH, hunto cu miembronan di directiva di hospital, a ricibi Premier Schoof y Minister Wyatt-Ras y a invita e delegacion pa un reunion cu demas miembronan di directiva. Durante di e reunion, a intercambia punto di bista riba e futuro di HOH, e importancia di inverti den capacitacion continuo di personal medico y di enfermeria, y e nesesidad pa reserva puestonan pa nos studiantenan local por specialisa na Hulanda pa por garantisa cuido medico di calidad y moderno pa nos comunidad y bishitantenan. Ademas a intercambia pensamento riba un cooperacion strategico cu Hulanda pa locual ta trata e compra di remedi hunto, pa por haya esaki na prijs mas economico.
No ta converti e debe di Covid, den un fondo di inversion
ORANJESTAD – Hulanda no ta pro pa converti e debe di Covid, den un fondo di inversion. Un fondo di inversion ta bon pa Aruba, pero no cu placa di Hulanda. Esaki tabata e comentario di e prome minister hulandes Dick Schoof durante su prome encuentro cu prensa diasabra na Aruba. Cu esaki, e ta confirma e pensamento di secretario di estad Zsolt Szabó, cu a bisa Noticiacla recientemente mescos tambe. Fondo di inversion ta un bon idea, pero cu fondo local. No manera cu e prome minister di Aruba mr Mike Eman a sugeri, y propaga durante e campaña electoral, esta cu mester converti e debe di Covid, den un fondo di inversion. Schoof a para ariba cu Aruba tin cu cumpli cu e palabracion haci, esta cu tin cu paga e debe bek. Pues no por cambia esaki den un fondo di inversion.
Bista fotografico di e prome dia di bishita di premier hulandes Schoof
ORANJESTAD - Diasabra e prome minister di Hulanda Dick Schoof durante su prome bishita na Aruba, e mandatario tabata basta ocupa. E la bishita Fort Zoutman, Cocolishi y Gobernador di Aruba. Un bista fotografico di su prome dia di bishita.
Prome Minister di Hulanda Dick Schoof ta na Aruba
ORANJESTAD - Prome Minister hulandes Dick Schoof a yega Aruba diasabra merdia pa un bishita di 22 ora. Prome Minister mr. Mike Eman a ricibi e mandatariona Aeropuerto Reina Beatrix acompaña pa altocomisario di Polis, drs. Ramon Arnhem y director interino di VNO, Vincent Storimans.
Prome minister di Hulanda Dick Schoof ta bishita Aruba e weekend aki
ORANJESTAD - Promé minister hulandes Dick Schoof ta bishita Aruba e fin di siman aki, pa ta exacto 22 ora, cuminsando diasabra 10 di mei. E bishita di cera conoci ta caracterisa pa Reino den un mundo cu ta cambiando. Banda di encuentronan cu gobernador-, prome minister y miembronan di Staten di Aruba, e bishita ta encera un programa diverso. Riba 10 di mei e ta biahe pa Aruba. Aki e ta bishita un empresa local y e ta bishita Hospital Horacio Oduber y Korrektie Instituut Aruba (KIA). E promé minister ta sali 11 di mei pa Corsou, unda e ta haña un rekorido na e base di marina.
Follow NoticiaCla
