BZK: Hulanda ta paga salario di miembro di CAFT pa Aruba

DEN HAAG – E gastonan pa e.o. salario di e candidato di Aruba den College Aruba Financieel Toezicht, no ta sali for di presupuesto di pais Aruba. E ministerio di relacionnan interior y reino (BZK), a confirma awe mainta na NoticiaCla.com cu ‘e salario di e miembronan (incluyendo Robert “Chobby” Croes), e secretario y e colaboradornan di e colegio (di supervision) ta pa cuenta di presupuesto di BZK. Pues no Aruba. Asina esaki ta kita tur duda, for di e rumornan cu a keda circula, si e persona aki ta haci e trabou 'pro deo' mirando cu e ta un persona cu pensioen, of si Aruba tin cu paga otro persona 'pensionado' pa un funcion asina. 

NOMBRACION CHOBBY CROES

Tabata siman pasa diabierna cu NoticiaCla.com su informacion di nombracion di e candidato pa Aruba, -Robert “Chobby “ Croes-, a bira oficial ora cu Conseho di Minister di Reino a aproba e proposicion di prome minister Mike Eman na Hulanda. Desde e conseho di minister di Reino di 12 di juni caba, a bay di acuerdo pa nombra Age Bakker y Sybilla Dekker como presidente y representante di Hulanda, respectivamente. Croes ta cuminsa cu su funcion entrante 1 di augustus, ora cu CAFT cuminsa.

ARUBA A PRESENTA SU CANDIDATO

Diabierna mainta minister plenipotenciario di Aruba na Hulanda a presenta Aruba su candidato pa College Aruba Financieel Toezicht durante e reunion di Conseho di Minister di Reino. E candidato di Aruba, Robert “Chobby” Croes, lo mester keda confirma y aproba, pa asina e colegio aki ta completo. E presentacion mester a tuma lugar durante e ultimo reunion, pero e momento ey ainda Aruba no tabata cla.

KEN TA ROBERT CROES

For di siman pasa caba, NoticiaCla.com a trece e noticia, pero cu inicial pa no 'tranca' e proceso. A informa e ora cu ',-diabierna awor-, gobierno lo postula conocido comerciante arubiano R.C. como e candidato pa Aruba den CAFT, na conseho di minister di Reino'. Fuentenan a confirma na NoticiaCla.com cu esaki ta e persona enberdad. Unabes cu Hulanda aproba sr Croes esaki pues, e tres miembronan ta cla y ta cuestion di warda e ley pasa, -si esaki logra na tempo-, pa por cuminsa traha. R.C., un comerciante veterano, ta e persona cu ta goza di confiansa di gobierno di Aruba pa e funcion aki. Pero ta keda na Hulanda, pa tambe aproba e candidato di Aruba. Si Hulanda no acepta, Aruba tin cu busca otro. Pero NoticiaCla.com a compronde cu gobierno di Aruba lo no mester tin problema cu e candidato aki.

ROBERT CROES

Croes ta maneha su propio negoshi (nan) di cual Antraco Holding ta esun mas conoci. E ta wordo considera como un veterano comerciante cu den pasado y presente, a y tin varios posicion den comunidad. Un persona sigur respeta den seno comercial y tambe social, a sa di lanta su companianan den pilarnan comercial grandi. Actualmente e ta den proceso di retira y pasa e negoshinan pa e siguiente generacion.

OTRO CANDIDATO

Prome cu Croes., tabatin un otro candidato, cu gobierno a haya pero cu despues di apenas dias, a retira su nomber. Gobierno e ora a haye ta pidi Hulanda pa mas tempo, y a priminti durante e ultimo reunion di conseho di minister di Reino, cu e proximo reunion, nan lo tin e nomber.

CONFIRMACION

Tabata siman pasa cu Gobierno di Aruba a confirma na NoticiaCla.com cu nan a haya un persona pa representa Aruba den e commission di supervision local, conoci como CAFT (College Aruba Financieel Toezicht). Prome minister Mike Eman a confirma, pero no tabata dispuesto pa duna e nomber di e persona. “E la wordo aproba pa conseho di minister (di Aruba)mientrastanto tambe” Eman a bisa. Mes momento sinembargo e la splica tambe cu e nomber tin cu bay pa conseho di minister di Reino. “Di momento cu e haya e aprobacion total ey, nos ta divulga tambe ken e persona ta” Eman a sigura e website aki.

PERSONA ‘MISTERIOSO’

E persona cu gobierno a haya dispuesto pa haci e trabou aki, segun Eman tin un trayectoria largo. “E ta un professional. E tin un sosten hopi amplio y hopi hopi grandi den nos comunidad”. Ni riba insistencia di NoticiaCla.com, Eman no kier a confirma si ta un persona cu inicial RC y cu e fam ta termina cu e fam Croes e tempo ey. “Nos no por specula of duna nomber na e momento aki” Eman a finalisa bisando. E la bisa solamente cu e persona a acepta, y ta considere ‘un honor pa por sirbi pais Aruba den un funcion importante asina’.

KIBRA RECES PA (C) LAFT

Mes momento, e proceso pa e ley mes pa formalisa CAFT, tabata den discussion. Ta dos siman pasa ainda NoticiaCla.com a raporta cu parlamento di Aruba ta bay kibra reces pa logra pasa e ley pa supervision financiero, conoci como LAFT (Landsverordening Aruba Financieel Toezicht). Vice presidente di parlamento Chris Dammers a confirma na NoticiaCla.com dialuna, cu esey ta necesario pa ‘interumpi’ e reces y logra pasa e ley prome cu 1 di augustus proximo, y asina evita problema cu Hulanda. Mientrastanto otro siman , ta inicia un periodo ocupa pa parlamento unda cu tin cu pasa por lo menos dos ley den e mesun siman, esta e ley di Green Corridor y BAZV.

RECES NA PELIGER

Cu e informacion aki, Dammers a confirma e informacion anterior di NoticiaCla.com, cu e reces di parlamento ta na peliger. Den e caso aki, Dammers ta mustra cu e reces lo cuminsa normal si, pero asina cu e ley ta cla pa drenta parlamento, lo interumpi esaki. E ora e lo percura pa yama suficiente hende (parlamentario) bek pa garantisa cu tin quorum. Den caso di AVP, esaki mester ta un total di 11 persona, di e 13. Ademas Dammers a confirma mesora tambe cu e mes lo ta esun cu lo presidi tur e reunionnan di awor te ora cu reces tuma lugar y caba, pasobra e president mes, esta Marisol Lopez Tromp lo ta for di Aruba por lo menos te fin di luna di juli ainda, pa motibonan personal. Lopez ta den exterior for di comienso di siman pasa. 

LAFT

Segun Dammers, e ley di LAFT ta canando su caminda ainda, y no a drenta parlamento. Mirando cu pa 6 di juli, parlamento lo cuminsa su reces, esaki lo wordo ‘kibra’ despues di tal forma cu tin suficiente hende, (quorum di 11) pa e ley por pasa. Segun Dammers, no ta cuestion cu e ley no ta bay pasa. E ta sigur cu e ley ta pasa, pasobra ‘ta un compromiso entre dos pais, Hulanda y Aruba’, pues cu lo haci tur posibel pa e pasa prome cu 1 di augustus. Asina e ta cumpli cu e protocol. Manera cu NoticiaCla.com a raporta, si Aruba no cumpli cu e fecha, e lo por haye cu un Algemene Maatregel van Rijks Bestuur, cu ta nifica cu Hulanda lo encarga su mes cu maneho di Aruba su finansa publico. Y for di informacion fidedigno, e maatregel lo ta riba mesa asina cu e fecha yega y vence.