Schwengle: Evaluando pa sigui cu operacion di curason na Aruba mes

ORANJESTAD – Minister di Salud di Aruba Alex Schwengle ta evaluando pa continua cu operacionnan di curason na Aruba mes. Tabata na aña 2014, cu Dr. Horacio Oduber Hospitaal, hunto cu un team di specialistanan den cardiologia di Aruba y Maastricht, encabesa pa Dr. Carghi a realisa un proyecto piloto pa midi e posibilidad nan pa realisa operacionnan di curason na Aruba.

RESULTADO

E resultado di e operacion y intervencionnan pa cu calidad a resulta excelente y ademas, e pashentnan cu a opera por a recupera den tur trankilidad na Aruba mes, den nan seno familiar. E proyecto a demostra cu Aruba por brinda cirugianan di curason cu ta sigur y cualitativamente di bon nivel. Schwengle a duna su completo apoyo na e proyecto piloto y ta contento cu e resultadonan.

CIRUGIA DI INTERVENCION

Loke a wordo realisa na Aruba tabata cirugianan di intervencion cardiologico, esta ponemento di “stent” y caterisacion, y cirugia di curason habri (open heart surgery). Open Heart surgery ta encera operacion di klep di curason y bypass.

DESICION DEFINITIVO

Actualmente ainda no a reanuda, ni a tuma decisionnan definitivo tocante e continuidad di e proyecto aki como cu ta den combersacionnan cu diferente grupo den exterior. Awor cu sa cu e intervencionnan quirurgico nan aki por tuma lugar sin ningun problema. Aruba ta evaluando e factibilidad financiero particularmente di e asina yama “open heart surgery” pa detrermina si mester sigui manda e pashentnan den exterior, of con lo por combina e servicionan aki cu otro islanan den nos region.

CONFIANSA

Schwengle a laga sa cu e resultado di e proyecto piloto ta duna e confiansa cu Aruba mes por realisa e operacionnan y intervencionnan menciona. Actualmente ta den proceso tambe pa determina ken lo bira Aruba su partner , a hiba combersacionnan cu e hospital di Corsou y Academisch Ziekenhuis Amsterdam. Loke Minister Schwengle ta busca ta un relacion di trabao “win-win” caminda tur partner por ta satisfecho cu e calidad y siguridad di e intervencionnan, y un situacion cu pa Aruba ta financieramente responsabel.