Dos aeroliña mericano ainda no por usa e terminal nobo na Aeropuerto

ORANJESTAD – Pasaheronan di e aeroliñanan mericano American Airlines y JetBlue, mester warda un poco mas prome cu nan tambe por usa e terminal nobo, destina pa buelonan pa Merca. Contrario na planificacion di aeropuerto, e cambio cu mester a sosode na aeropuerto Reina Beatrix comienso di mei, unda cu tur aeroliña Mericano por a usa e terminal completamente nobo na e parti pabou, e dos aeroliñanan no por usa e terminal ainda. For di miembro di management team interino di Triple A NV, responsabel pa e maneho di e aeropuerto, Jürgen Benschop, gobierno mericano a pidi cierto cambionan tecnico extra, cual Aruba tin cu cumpli cune. No por bisa cuanto tempo esaki ta dura. 

E SITUACION

Manera ta conoci, e pasaheronan cu biaha pa Merca, tin un proceso diferente cu otro pasaheronan, mirando cu nan tin cu pasa e imigracion y douane mericano, y e parti aki ta teritorio mericano. E cambionan haci, awor ta pone cu hasta maletanan cu pasa, ta pre-cleared, y no mester busca nan mas, unabez cu check in, te ora cu bo yega Merca. Y mirando cu esaki ta responsabilidad di gobierno mericano, nan tin hopi di bisa riba e proceso. Y aki ta unda cu a compronde cu Aruba mester a ‘adapta’ cierto parti di e proceso, prome cu por clear pa tur aeroliña mericano por usa e facilidad. No ta conoci si, pakico ta net e dos aeroliñanan aki, esta American y JetBlue, tin cu warda, mientras cu tur e otro 4 aerolinanan si por usa e terminal nobo. E cuater aeroliñanan ta usando e terminal nobo ya caba for di dia 8 di April di e aña aki. Pasaheronan y otro usuarionan cu subi e portal di e aeropuerto, ta haya un notificacion asina nan subi riba dje, cu e mensahe specifico aki. 

E CAMBIO

Manera cu Noticiacla a raporta caba, aeropuerto di Aruba  ( Aruba Airport Authority N.V. (AAA)) a cuminsa cu e  “soft opening” di su terminal nobo di check-in pa vuelonan Mericano diamars 8 di April ultimo, marcando e comienso di un transicion pa e facilidad nobo. E prome vuelo cu a check-in na e terminal nobo tabata e vuelo di Delta Air Lines DL1761, saliendo for di Aruba pa Boston. E pasaheronan a ricibi asistencia door di un team di boluntarionan di AAA cu tabata presente den henter e area pa guia nan y garantisa un proceso trankil durante e fase inicial aki. 

E apertura a inclui operacionnan di check-in pa Delta, United, Spirit y Southwest Airlines. JetBlue y American Airlines tabata programa pa transiciona pa e terminal nobo riba dia 29 di april, cu tabata e momento cu e terminal lo bira completamente operacional. Esey awor tin cu warda un poco mas. 

Mientras cu esaki ta marca un paso importante pa sigui engrandece e experiencia di pasahero,  Aruba Airport Authority a reconoce cu, mescos cu cualkier transicion di e escala aki, algun ahuste y reto operacional lo por a surgi den e dianan cu a sigui. Y berdad, esaki ta netamente loke a sosode tambe.  AAA ta keda enfoca riba traha estrechamente cu su partnernan y personal pa atende cu cualkier reto y ahuste rapidamente y efectivamente. 

A ricibi e pasaheronan cu a check-in ora cu e terminal nobo a habri, cu musica di steelpan y cos dushi local pa recorda e momento. A diseña e experiencia pa duna un caluroso bonbini y yuda guia e biaheronan segun cu nan ta cera conoci cu e diseño y fluho nobo. 

Esaki ta un periodo di transicion, y nos ta aprecia e pasenshi y cooperacion di nos pasaheronan, personal y partnernan segun cu nos ta traha den e fasenan inicial di operacion di e terminal nobo”, asina Jürgen Benschop, Chief Operations Officer na Aruba Airport Authority N.V, a menciona na e occasion ey. El a continua bisando cu: “Nos ta comprometi pa entrega un experiencia sin problema y amistoso pa pasahero y ta vigila cada paso cuidadosamente pa garantisa mehoracionnan continuo.” 

“E ‘soft opening’ aki ta refleha e compromiso y coordinacion di hopi stakeholder interno y externo, specialmente nos partnernan di aerolinea, nos ‘ground handlers’ y US CBP”, asina  Barbara Brown, Chief Revenue Development & Communications na Aruba Airport Authority N.V, a expresa. El a agrega cu “Nos ta spera di por sigui cu un colaboracion fuerte mientras cu nos ta prepara pa e transicion completo e luna aki.”  

E terminal nobo di check-in ta parti di e inversion di largo plaso di Aeropuerto di Aruba den mehora eficiencia, capacidad y calidad di servicio en general—no solamente p’e biaheronan cu ta bay Merca, pero den futuro pa tur pasahero cu ta haci uzo di nos aeropuerto.