Mayan ta baha nomber di Radisson y traha caminda pa Hilton

ORANJESTAD – Diaranson mainta e nomber di 'Radisson Resort & Casino' ta wordo baha di e edificio, pa traha caminda pa esun di 'Aruba Caribbean Hilton Resort & Casino'. No ta conoci si e nomber Hilton lo wordo poni mesora. NoticiaCla.com a compronde cu e prioridad awor ta pa kita e nomber, y despues di un tempo pone esun di Hilton. Mientrastanto tin un ekipo grandi di e cadena hotelero na Aruba pa entre otro prepara e traspaso, y entrena e trahadonan den e forma di “Hilton”.

GRAN DAME LOCAL

Entrante 15 di juli, manera palabra, e hotel ta pasa pa e doñonan nobo, AGF, cu de hecho ta nifica cu e ta pasa pa trahadonan cu ta parti di e Tourism Fund, y consecuentemente tambe por yama nan mes ‘parti doño’. Manera cu e doñonan di AGF a bisa, orguyoso cu ‘The Grand Dame’ ta bek den man di hendenan local.

DEAL SEYA

“Nos ta hopi contento di a firma porfin” tabata e prome palabranan di e socio director di Aruba Growth Fund (AGF) Rene Kan, dia 24 di juni ultimo, den su prome declaracion exclusivo pa NoticiaCla.com despues di a firma e documento cu ta seya e compra di e hotel. “Nos ta hopi agradecido tambe na minister (di Turismo) Otmar Oduber cu a haci hopi esfuerso ultimo simannan pa logra e deal aki” Kan a sigui bisa Noticiala.com. E la confirma asina cu e intermediacion di e mandatario tabata cardinal pa logro di e deal . Cu e firmamento nan a yega un fin na e proceso y tur hende por a hala rosea trankil, cu e hotel no ta bira un all inclusive.

DETAYENAN

Segun Kan, diaranson atardi 5’or e tres partidonan AGF, Carlson Group y RIU a firma e acuerdo, mientras cu e traspaso official mes, lo tuma lugar dia 15 di juli proximo. Mes momento e la confirma tambe cu e placa di e compra, tambe a pasa caba pa Carlson Group, aunke e no kier a divulga e suma cu a paga den e deal aki. RIU tabata parti di e proceso di firmamento, como cu nan tabata esnan cu inicialmente a firma pa compra di e hotel caba. Y consecuentemente esey mester a wordo cambia. RIU a hala atras despues cu e caso inicial a tuma lugar, pa asina AGF y Carlson Group por a continua atrobe cu nan negoshacion. Den esaki, segun Kan, e no por a caba subraya con instrumental con importante e intermediacion di Oduber tabata pa logra convence RIU y Carlson Group pa back off di e deal y laga AGF sinta bek na mesa. “E ta algo cu sigur nos como Aruba Growth Fund ta aprecia masha hopi mes” Kan a sigui bisa. Na final di dia tambe, AGF, Carlson Group y gobierno a pidi corte y e  huez cu a trata e caso inicial, pa revoca e caso cu AGF y gobierno a cuminsa, oficialmente, mirando cu partidonan a haya otro. 

OPERACION

Unabez cu e traspaso tuma lugar dia 15 di juli, e hotel ta bira propiedad di AGF, y cu esey, ta haya e derecho pa cambia e nomber pa Hilton Aruba Caribbean Resort & Casino. Manera Kan a splica den pasado, tabata importante pa nan, pa e nomber Aruba Caribbean keda aden ya cu e ta un parti importante di nos historia. Mas aun cu ta un compania local ta bira doño di un di Aruba su prome hotelnan riba e Palm Beach strip. Tambe Kan a confirma cu na 2016 nan lo cuminsa cu renobacion di e hotel, pa asina e haya e bachi conoci na nivel di e cadena Hilton.