Envez di e 700 florin priminti, pensionadonan a haya 250 florin extra

ORANJESTAD – Envez di e 700 florin cu e partido berde a priminti cu tur pensionado ta haya, nan a haya 250 florin e siman aki. E prome mandatario a splica cu berdad no por a cumpli (ainda) cu e promesa, pero cu esaki ta debi cu e gabinete anterior a haci cierto cambio, cu a ‘stroba’ e gabinete actual di tin mas fondo disponibel. Di otro banda, ex minister di finanza Xiomara Maduro mesora a pone riba su pagina cu ta debi cu e gabinete anterior a laga un surplus atras, cu e gabinete actual por a duna e 250 florin.

REUNION CU OPPA

Prome Minister mr. Mike Eman, a tene un reunion e siman aki cu presidente di Organisacion di Pensionado Publico Arubano (OPPA), sr. Ivo Valdes. Y tabata durante  e encuentro, cu Prome Minister a comparti e grato noticia cu entrante 30 di april, mas di 19.000 pensionado di AOV (Algemene Ouderdomsverzekering of AOV) lo mira un aumento efectivo di 250 florin riba nan entrada mensual, den forma di reparatietoeslag. E aumento aki ta representa un cambio substancial despues di hopi aña. E mandatario a splica cu e ta sigui purba pa ainda cumpli cu e promesa di 700 florin, pero esaki ta e comienso.