Cantidad record di barconan di container ta cancela of cambia di ruta pa motibo di tarifanan di Merca

ROTTERDAM - E ta “caos completo” den e sector di container. Nunca antes asina hopi barco di lama a wordo cancela mundialmente den un luna manera pa e luna venidero: 80 barco di container a cancela of cambia nan ruta. Esaki ta alcansa mas o menos 20 porciento di e capacidad total di e container. Pa comparacion, durante e altura di e crísis di corona, e cantidad di biahenan cancela tabata 50, segun e asociacion di industria Evofenedex.

E efectonan di e politica nobo di comercio mericano ta birando mas y mas notabel den navegacion internacional. Segun Casper Roerade di Evofenedex, e cantidad di cambionan na e rutanan di barco ta alarmante y e no ta descarta cu mas barco lo wordo saca for di servicio den e proximo simannan. “E impacto completo riba transporte no ta cla ainda,” Roerade ta bisa.

Segun Roerade, transporte di container por wordo compara cu un liña di bus. E barco di container tin un ruta fiho. E cantidad di parada ta varia pa servicio di envio, pero averahe un barco di container ta mara den ocho diferente haf. Na cada haf un barco ta wordo (parcialmente) descarga y carga prome cu sigui pa e siguiente haf.