Arubiano cu posibel castigo di prison pa a registra como mericano

TOLEDO – Un arubiano residencia na Merca, por haya castigo di prison di 1 aña, pa a ‘pretende di ta mericano y vota den un eleccion mericano’. Ta trata di e ciudadano arubiano Denicio Brooks (60) cu a ‘sigura huez’ cu e la comete un fayo honesto’. Un huez di condado di Lucas a bisa e arubiano, cu e tabata ‘deshonesto’ pa e registra pa vota pa un eleccion, asabiendas cu e no ta un ciudadano mericano.

CULPABILIDAD

Brooks a admiti culpabilidad den un corte na condado di Lucas, pa ‘registro falso’, cu ta wordo considera un delito di 5 grado, ora cu e la registra pa vota na February di 2012 pa un primario y eleccion general pa presidente. Ora cu e haya su sentencia dia 27 di Augustus proximo, huez Ruth Ann Franks por dun’e un castigo di 1 aña di prison. .

CIUDADANO DI ARUBA

Brooks a bisa corte cu e no tabata un ciudadano mericano, y cu e la nace na Aruba y muda pa Merca ora cu e tabatin 8 aña di edad. Ora cu e la yena su formulario di registracion pa vota, e la yena ‘si’, na e pregunta si e ta un ciudadano mericano, y firma su nomber. “E tabata un fayo honesto, huez”, Brooks a bisa indicando cu no tabata su intencion di viola ley. “Mi ta aprecia cu bo ta bisa cu no tabata bo intencion, pero nos tur tin un responsabilidad pa lesa un documento ora cu nos les ‘e” e huez a bisa. Sigur ora cu e ta bisa cu bo por comete perhurio (gaña bou di huramentacion), y wordo multa y castiga. “Bo sa kico esey kier men. Ora cu bo gaña, bo ta den problema!”

RESIDENTE PERMANENTE

Brooks a bisa huez cu e ta un residente permanente di Merca y a mustra huez su carchi di residente. “E ta indica hopi cla, cu e pais di bo ciudadania, ta Aruba” e huez a sigui bisa. No ta prome biaha cu Brooks a comete e ‘delito’ aki. Pero nan a wordo elimina como parti di un ‘deal’ pa menos castigo, si e coopera. Segun Brooks, e motibo cu e la registra pa vota, ta pasobra e congresista pa cual e kier a vota, Marcy Kaptur, a yude ora cu e la perde su ‘green card’.