Bermudez: Decision final na augustus riba asunto ‘nummerplaat’

ORANJESTAD – Mientras cu a dicidi caba cu otro aña pueblo no ta bay paga pa number di auto mas, e pregunta con pa haci’e otro, no ta conoci. E opcionnan ta riba mesa, y ta varia di usa nummerplaat generico, y cambia solamente e sticker di muestra di cambio di aña. “Aworaki un comision ta evaluando tur pa dunami un conseho final” minister di finanza Angel Bermudez a bisa NoticiaCla.com dialuna. “Fin di augustus mi ta spera di hayele (e conseho)”. Pero e intencion ta pa tur cos keda introduci pa 1 di januari 2016.

REACCION ARTICULO

For di momento cu NoticiaCla.com a publica e articulo dialuna riba e cambio di proceso di paga pa nummerplaat y enves aumenta accijns riba gasoline, e la crea un ola di reaccion. “Number (di auto) ta keda” Bermudez a purba clarifica na NoticiaCla.com. “Pero por duna stickers mane na Corsou y BES (eilanden)”. E la sigura cu e decision final riba e asunto no a cay ainda. E contenido di e articulo a wordo saca for di e articulo original cu a aparece den edicion di juni di 'Aruba Dushi Tera', un revista trimestral di gobierno na hulandes cu ta repasa grandemente e trabou di gobierno. (lesa e articulo original den e revista aki)

PROFESOR VERMEEND

Ademas e mandatario a sigura cu e topico aki, contrario na e articulo su contenido (cu a sali for di seno di gobierno), no ta cay bou di e comision di profesor Willem Vermeend. “E ta un topico di varios aña caba. Anto mi a rebiba e comision pa finalisa e proceso ‘for once and for all”. Ora cu a puntra e mandatario pakico e articulo ta cita profesor Vermeend cu e proyecto aki, e mandatario a reaccion cu esey ‘no a wordo coordina’ cun’e.

DI PAGA NUMBER DI AUTO PA PAGA GASOLINE

Awe mainta NoticiaCla.com a publica e articulo riba e topico menciona. Aki ta papia cu 'pagamento di number di auto ta bay cu pensioen'. Por lo menos segun e revista di gobierno “Aruba Dushi Tera”. E revista ta relata den e articulo 'Helder, eenvoudig, eerlijk en effectief', riba e situacion proximo di impuesto cu Aruba lo conoce. Mientras cu nos sa cu tin cambio, algun detayes ta resalta den e articulo. Entre nan, e hecho cu no ta paga number di auto mas, sino ta bay paga mas impuesto riba gasoline. “Esun cu core (auto) mas, ta paga mas”, ta e principio di e pensamento aki. Mes momento e ta nifica tambe cu nos no mester para den rij mas tur aña pa paga nos number di auto. Tur ta parti di e plan segun profesor Willem Vermeend, cu a haya tarea di gobierno pa ‘simplifica’ e proceso di impuesto. Minister di finanza Angel Bermudez a confirma na NoticiaCla.com, cu 'si e comision bin cla na tempo, e lo keda introduci na januari 2016'. 

UPDATE RIBA PAGO DI NUMBER

Siman pasa ainda, a raporta riba e cantidad di numbernan di auto riba cual no a paga impuesto ainda. Algo asina pues lo no ta un problema mas, si e plan di gobierno logra. E aña aki, un 43% di automobilista no tin nan number di 2 y 3 kwartaal paga. Esaki mientras cu 57% (mayoria) si a cumpli cu nan pago na ora. Mester tene na cuenta cu 30 di juni ultimo tabata e ultimo dia pa paga e di 3 kwartal.

SPECIFICO

Mas specifico, un total di 2973 automobilista no a paga nan prome kwartal ainda y 4541 no a paga nan di 2 kwartal. Mientrastanto esun mas grandi ta esun di 3 kwartal cu ta 17.906 automobilista. Den numbernan di auto di huur, tin 46% cu no a cumpli cu nan pago di number di auto, sigui pa 32% di taxista cu no a cumpli cu nan pago di number.