Sevinger ta sostene waarnemer DIMAS pa adjunct director

ORANJESTAD – Minister encarga cu DIMAS, Benny Sevinger ta sostene e actual waarnemer di e departamento como e proximo adjunct directeur.  Ademas, e  funcion di adjunct director lo cay bou di e director di DIMAS, Kathy Paskel. Asina e mandatario responsabel pa e departamento di permiso, Benny Sevinger a bisa den un declaracion na 24ora.com dialuna. Segun e mandatario, ta ‘simplemente oficialmente ta yenando e funcion di “adjunct directeur” cu no a wordo oficialmente yena prome’. E funcion ey pues ta bou di e director.

REUNION DIALUNA

Dialuna e director di DIMAS a reuni cu e minister corespondiente, pero no ta conoci kico a sali for di e combersacion ey. Mes momento diamars e director lo informa su staf y sindicato di e resultado di e reunion ey.

EXPERTISIO

Contrario na pensamento di e.o e trahadonan, e mandatario ta sinti cu Mario Wever ‘tin e experticio y experiencia’ pa haci e trabou. E la haya conseho di su conseheronan y a bay di acuerdo. Ademas, segun e mandatario, ultimo añanan e persona en cuestion ta trahando caba como waarnemer.

WELGA

E mandatario a bin tende di e problema laboral, despues di e reunion entre su chef de bureau y e director di DIMAS. Segun Sevinger, ‘un democracia ta duna espacio pa si un trahado no ta di acuerdo, semper e por manda un carta di protesta sea personalmente of via di su sindicato’. Pero e no ta di acuerdo cu e trahadonan a bay den accion y pone trabou abou.

SITUACION TENSO

NoticiaCla.com a raporta dialuna mainta cu e situacion laboral na DIMAS a habri tenso e siman aki, pendiente un reunion entre e director Kathy Ruiz-Paskel y e minister concerni, Benny Sevinger dialuna atardi. Pendiente e resultado di e reunion aki, e trahadonan a ‘priminti’ di lo tuma nan siguiente paso. No ta descarta cu lo bolbe drenta den accion manera cu a haci caba diabierna ultimo. E reunion di awe lo mester a trece mas claridad pa e trahadonan. Si e resultado ta uno negativo, no tabata descarta cu cos por empeora. “E reunion ta importante” un trahado a sigura NoticiaCla.com diabierna ultimo.

ACCION DI DIABIERNA

Mientras cu personalmente no tin nada contra e persona, e hecho cu a nombr’e como un adjunct director sin pasa e proceso corecto, ta condenable. “E ora cu bo ta insultando e inteligencia di e trahadonan di DIMAS”. Asina e presidente di e sindicato TOPA cu ta representa e trahadonan di DIMAS, Rene Bernabela a bisa diabierna mainta pafo di edificio di DIMAS. E trahadonan manera anticipa, a dicidi di pone trabou abou diabierna mainta (pa inicialmente un ora), pa protesta e desaroyo rond di nombracion di un persona como director adjunct. Ta trata di e persona Mario Wever, cu segun e trahadonan, no tin e experiencia y /of papelnan necesario pe. Un nombracion cu a bin for di ‘ariba’, y cu no ta conta cu e mayoria di e trahadonan.

E ACCION

E accion a cuminsa mainta 9’or, mientras cu e edificio tabata yen di cliente cu a bin pa procesa nan permiso of atende nan otro asuntonan necesario. E clientenan a wordo bisa pa bandona e edificio y warda te ora cu nan ta bek. Mientras cu e clientenan tabata para dilanti pafo, wardando, e trahadonan a bay patras pafo, pa warda nan sindicato yega.

HURISTA

Segun Bernabela, tin yen di hurista na DIMAS cu por asumi e funcion. “Anto ainda riba dje, kier delega cierto funcion di e directora, y pone bou di e adjunct directeur. Esey no ta aceptabel!”, Bernabela a sigui bisa NoticiaCla.com awe mainta. A reitera cu e punto ey lo wordo ‘bari for di mesa’ pasobra esey no por.

RAPPORT PWC

Loke mas ta indigna e sindicato, ta cu tin un rapport extenso di Price Waterhouse Coopers (cu segun trahadonan, a costa 245.000 florin pa traha), cu ta bisa cu mester tin un hoofd y no un adjunct directeur na cabes. “Toch kier bay over na nombra un adjunct directeur, pero pa metanan politico”. Esey nan ta para fuerte contra. “Mester sigui e rapport manera cu mester ta”.

KATHY RUIZ PASKEL

A sigui un intercambio cu e directora (Kathy Ruiz-Paskel) cu a bin abou pa duna cara y atende cu e sindicalista. Berdad cu e directora a ‘schedule’ un reunion cu e sindicatonan pa dialuna, a dicidi cu ta honra e peticion di e sindicato y a atende e sindicato e momento ey tambe.

REUNION CU TRAHADONAN

Segun e directora su splicacion na NoticiaCla.com, enberdad despues cu a atende cu e personal diahuebs atardi, a informa nan di e decisionnan tuma pa e minister en cuestion, riba e organisacion y tambe cierto nombracion pa DIMAS. Na final, a nota cu e personal no a gusta mucho. “Nan a reacciona na un forma cu no ta satisfecho y a acudi na nan sindicato. Mi mes a wordo informa awe mainta cu lo tin un protesta” Ruiz a bisa NoticiaCla.com.

REUNION CU MINISTER

E directora a confirma tambe cu e mes a keda di papia cu e mandatario dialuna awor riba e informacionnan cu e mester a ‘pasa door’ na e trahadonan. E tambe tin pregunta riba e caso, y como tal lo haya detayes di esaki dialuna si tur cos ta bon. Consecuentemente e la schedule un reunion cu e sindicato(nan) (tin mas cu un sindicato cu ta representa e trahadonan) diamars, y brief nan riba e resultado di e reunion di dialuna.

CLIENTENAN AFECTA

A confirma cu pa loke ta e clientenan afecta, a laga esnan cu ta riba cita, sa cu nan lo por bin diabierna awor, debi cu Ruiz no sa con largo e accion por a dura. Esnan cu ta ‘inloop’, esta yega sin cita, a opta pa warda, y otronan a dicidi cu lo bin otro siman tambe. “A informa e clientenan debidamente” Ruiz a sigura e website aki.