Camara di Comercio ta sigura cu nan ta para pa tur sector di Aruba

Camara di Comercio ta sigura cu nan ta para pa tur sector di Aruba

Posted on 04/25/2025 4:27 pm AST | Updated on 04/25/2025 4:30 pm AST

ORANJESTAD – Camara di Comercio y Industria Aruba (KvK), un dia despues di a haya critica di por lo menos 3 gremio comercial AHATA, CUA y ATIA riba nan actuacion recien, a reacciona bek diabierna atardi. Diahuebs e tres gremionan a habri afo contra KvK, mandando e mensahe cu KvK no ta representa sector priva, y como tal no por papia na su nomber. E punto tabata e combersacion cu KvK tabatin recientemente cu gobierno (lesa:Mike Eman) unda cu a sugeri cu sector hotelero mester aporta mas na comercio. Algo cu no a cay nada bon cerca e tres gremionan. Y awe KvK a reacciona.

UMBRELLA ORGANIZATION

Segun e reaccion di e gremio, nan ta bisa cu nan como KVK ta fungi como un “umbrella organization” cu ta representa y salvaguardia actividad economico na Aruba como e representante di comercio y industria di Aruba conforme stipulacion den ley (articulo 1.1 di e Landsverordening op de KvK). “Pues, KvK ta un institucion independiente institui pa ley cu ta duna conseho solicita y/of no solicita na Gobierno relaciona cu e desaroyonan economico na Aruba.  KvK ta haciendo esaki ya pa 95 aña caba” nan ta cuminsa na bisa.

REUNION CU MINISTER 

KvK ta sigui bisa cu nan ta reuni regularmente cu e Minister encarga cu Economia y cu Minister President encuanto diferente puntonan cu tin influencia riba e economia di Aruba. Alabes, KvK ta reuni cu otro stakeholders clave, manera gremionan comercial y sindical, organisacionnan di diferente sector, departamentonan y companianan gubernamental, cu enfoke riba e economia di Aruba y e interes general. 

FORMACION DI GOBIERNO

Den nan reaccion, KvK ta sigui bisa cu durante e proceso di formacion di e Gobierno nobo, KvK a wordo specificamente pidi door di e formadornan pa duna informacion riba cierto topico y KvK a cumpli y a duna e informacion cu a wordo pidi.  Despues di e instalacion di e Gobierno nobo, KvK tabatin un reunion di introduccion cu Minister President. Minister President ta reconoce e importancia di KvK como un institucion independiente pa duna conseho, en bista cu KvK ta considera y boga pa e interes general di tur sector. Durante di e reunion cu Minister President a delibera riba 12 punto di atencion importante y urgente cu ta regarda pais Aruba den su totalidad, entre otro e situacion di Bubali Plas, escasez laboral, transparencia den finansas publico y gastonan di Gobierno. 

RECONOCE E REPRESENTACION DI COMERCIO

Reconociendo e representacion di comercio amplio di KvK y su experticio, Gobierno di Aruba ta inclui KvK den diferente deliberacionnan y plataforma, manera Dialogo Social, segun splicacion di KvK. “E participacion aki ta refleha practicanan den otro economianan regional, por ehempel den CARICOM”. 

LINK DI COMUNICACION 

Cu un conexion directo cu 20,000+ negoshi registra na Aruba, KvK ta bisa cu nan ta un link di comunicacion vital entre Gobierno y e sector comercial. KvK ta ricibi feedback continuo di hopi comerciante y tambe otro institucionnan via corespondencia, reunionnan y surveys y ta uza e feedback aki pa boga pa atende e preocupacionnan comparti. E tarea aki ta central den e mision di KvK.

RETONAN 

“Teniendo na cuenta e diferente retonan cu tanto e sector comercial como tambe pais Aruba tin nos dilanti, KvK ta reitera su posicion cu lo sigui duna su aporte y traha estrechamente cu Gobierno y demas stakeholders, incluyendo e gremionan comercial, na bienestar di e sector comercial y Aruba en general” KvK a finalisa bisando.

  • Powered by SETAR