Canada a prohibi entrada di 14 mascota procedente for di Aruba

FLORIDA – Falta di documentacion apropia pa un cantidad di bestia (mascota) procedente di Aruba, -cu destino final Canada-, a pone cu nan a wordo manda bek pa Miami. E bestianan tabata extremadamente mal nutri. “Hopi di nan tabata anemico”, veterinario John Santamarina di Tamiami Animal Hospital a bisa. “Nan tabata yen di purga. Nos a haya coccidian, bichi, y condicion malo di cuero. Nos sa cu nan tabata procedente di Aruba. E caso aki a hala hopi atencion y a te hasta aparece riba noticiero na Miami. 

INFLUX DI BESTIA

Santamarina y Tamiami Animal Hospital a ricibi e influx di e bestianan directamente for di e aeropuerto internacional di Miami. “Duana di Canada no a acepta nan, ora cu nan a yega na e punto di entrada. Y como tal a manda nan bek pa Miami”, Ceci Mora di Pet Limo Animal Services a bisa.

FALTA DI DOCUMENTACION

Ta trata di 10 cacho, 8 cachoro, y cuater pushi cu lo a wordo mata si nan a keda Aruba segun activistanan di bestia a declara. Mirando cu e futuro pa e bestianan aki tabata scur na Aruba, nan a wordo manda Canada pa wordo adopta. Sinembargo e bestianan no tabatin e documentacion necesario, forzando autoridad canades pa manda nan bek. Gruponan cu ta maneha bestia na Canada, a notifica na socionan na Miami via rednan social. “Asina mi a haya sa y a plama e noticia rond” Zeinab Alamathkour di Miami Pet Assistance Coalition a bisa. E bestianan tabata den masha mal condicion “Regina Vlaskek, di Saving Sage Animal Rescue Foundation a bisa. “Nos tabata kier a duna nan cuminda, awa y saca nan for di nan propio sushi”. Na Miami, e bestianan a wordo baña, y busca y transporta pa Tamiami Animal Hospital. “Nos no sa ainda unda nan lo termina, pero nan prioridad awor ta e condicion di e bestianan.

DECLARACION AMERICAN AIRLINES

American Airlines mientrastanto, cu ta e aerolinea cu a transporta e bestianan, a saca un comunicado riba e suseso. “American Airlines ta tuma e salud di nos pasaheronan di 4 pata hopi serio. Riba 12 di July, un pasahero biahando for di Aruba pa Miami y sigui pa Toronto, a purba drenta Canada cu 14 bestia. Oficialnan canades a prohibi nan entrada. Nos team na Toronto a cuida e bestianan y a pone nan riba e proximo buelo bek pa Miami. Unabes na Miami, nos a tuma contacto cu Pet Limo Animal Services pa yuda nan American Airlines ta wardando riba e veterinario pa determina e proximo paso. Gruponan activista pa bestia na Miami ta rabia riba e activista di bestia di Aruba, cu a keda sin su bestianan. No ta haci mencion di e persona aki.

ADOPTA

A bira custumber ultimo tempo cu turistanan ta adopta cachonan mas parti, cu nan topa na Aruba y ta transporta nan pa nan pais natal. Gran parti di esaki ta bay Merca y ta bay den bon estado. Mayoria di nan ta bira ‘success stories’, mientras cu otronan ta haya un fin menos positivo. Un otro caso fastioso, ta di e cacho Whitey, cual caso a termina te den corte mericano pa determina su destino. Aki por mira e raportahe cu tabatin na television di Miami.

.