Marina ta intercepta 3 transporte di droga den un siman di tempo

ORANJESTAD - E barco di marina Hulandes  Zr.Ms. Groningen den un siman di tempo a intercepta 3 transporte di droga den region Caribe.  Cu esaki un total di 1.653 kilo di droga a ser kita for di caya.  E intercepcionnan ta data di 4, 5 i 9 di april, pero awor esaki a keda publica.

Durante e prome accion riba 4 di april,  un avion patruyero di Wardacosta Region Caribe a nota un boto sospechoso.  Despues di esaki inmediatamente e NH90-helicopter di bordo ademas di 2 boto di intercepcion rapido (FRISC) di  Zr.Ms. Groningen, a keda desplega.

A conduci di huy saca paketenan for di e boto tira den laman. A neglisha señalnan di stop y tironan di advertencia. Desde e NH90 a tira directamente riba e motornan di e boto/go fast y destrui esakinan.

E ekipo di Wardacosta Mericano hunto cu Cuerpo di Marina a intercepta despues 921 kilo di marihuana.

DI DOS Y DI TRES CAPTURA

Ni sikiera 24 ora despues, durante un patruya un biaha mas a detecta un boto rapido di contrabanda. Tambe aki a keda obliga di stop. Durante e deteccion aki 342 kilo cocaina a keda confisca.

Durante un accion similar riba 9 di april, 145 kilo di  marihuana ademas di 245 kilo di cocaina a keda confisca. Tur mercancia ilegal a keda entrega na Wardacosta Mericano.

BARCO PATRUYERO DI STACION

Zr.Ms. Groningen for di fin di januari ta e barco staciona den Region Caribe.  Ehecucion di operacionnan contra traficacion di droga ta un di su tareanan. Den esaki e barco di Marina ta traha cu variacion hunto cu Wardacosta Mericano y Wardacosta Region Caribe.

Entretanto  Zr.Ms. Groningen durante 6 transporte ilegal di droga a intercepta mas o menos 5.000 kilo di contrabanda.