Analisis: Hiba oposicion responsabel y alcaso si!

Scirbi pa Tito Laclé

Ultimo dia y simanan tin algun ex minister y parlamentario cu ta inundando e rednan social cu nan gritonan opositorio, mayoria biaha  cu gritonan mas bien di iritacion, y tambe sin mucho logica. E ta un custumber y parti di e cultura politico, cu ora cu un partido politico perde eleccion y bay oposicion, su miembronan ta cuminsa actua como e opositor mas fuerte cu tin. Ta critica tur cu tin. Te hasta te na un punto cu nada no ta bon. Hiba oposicion, semper y cuando e ta un oposicion sano y pa tene e gobernante skerpi y honesto. Pero ora cu e gritonan bira gritonan di desesperacion y sin base, e ta cuminsa parse cu e politico tin falta di atencion y ta haci todo por todo pa ‘keda in the picture’. Mi mensahe ta simple: Duna e gobierno nobo e espacio pa goberna. Tene nan skerpi, pero al caso. Apenas e gobierno tin algun siman gobernando. Y pa nan malasuerte den nan cu nan, tin asuntonan ainda cu ta broei, cu ta pone cu nan no por sali afo y goberna den un ambiente ‘trankil’. Y mientras cu esaki no ta resolvi, nan no por funciona completo. Y den e parti aki,  inunda e plataformanan social cu gritonan cu ta zona como grito di ‘envidia’ y te hasta ‘falta di atencion’, no ta yuda e causa. Laga e gobierno sikiera yega su 100 dianan, y despues, analisa e situacion y duna e critica necesario. Semper ta facil pa ‘gara’ un hende hacienda algo malo, pero masha poco ta ‘elogia’ e persona pa cosnan cu tambe a bay bon. Awor, mi mester ta honesto tambe, y recorda cu esaki no ta algo nobo. E ta un practica cu practicamente tur politico y partido a haci den pasado. Berde, heel,  blauw y tur otro color. Tur ta haci’e. Pero, esey NO ta hacie algo corecto. Un caminda e situacion mester bolter. Mi kier pensa cu nos a ‘madura’ y cu por cuminsa practica ‘politica nobo’.  Hasta e dicho ‘nos no ta nan’ no a funciona. Tur a resulta di ta haciendo mescos, solamente cu un otro color y forma. Si cada ken haci nan trabou manera mester ta, di mes cos lo cana bon. Oposicion mester hiba un oposicion a base di echo, y tene e contrincante skerpi. Prensa tambe tin cu haci su trabou responsablemente, y tambe ta e ‘watchdog’ y tin cu tene e politiconan na poder ‘honesto’. Asina so nos por bay dilanti. Di otro forma, nos lo sigui deteriora so, y crea un ambiente cu no ta productivo. Manos a la obra!