Croes: Deadline poni pa Dimp duna informacion di de Meza awe 3pm ta sigui valido!

ORANJESTAD – No obstante e echo cu Departamento di Impuesto DIMP a entrega documentonan di e politico y candidato pa minister Mike de Meza dialuna, riba peticion di su abogado mr Desiree Croes, ainda e ‘deadline’ pa DIMP entrega documento pertinente mas tarda awe diahuebs pa 3pm, ta vigente. Noticiacla a puntra e abogado diaranson, si e deadline ta sigui vigente, y e abogado den su contesta cortico, pero firme a bisa ‘Si!”. Ora cu a puntra e abogado pakico ta mantene e deadline si DIMP a manda documentacion caba, e abogado tabata mas specifico. “Si, pero ainda e no ta klop!’. Esaki ta nifica cu e informacion cu a wordo manda, ainda no ta clarifica e situacion fiscal di su cliente, pa cual e deadline di awe ta sigui vigente. Esey kier men cu si pa awe tardi 3’or DIMP no manda ‘mas’ informacion, lo demanda nan den corte. 

DEMANDA INICIAL

Tabata dialuna cu e abogado a informa publicamente cu debi cu no ta hayando informacion pertinente pa su cliente, unda cu e por deduci y comproba cu tur cos ta cla cu ne fiscalmente, y cu e ta ‘in the clear’ of por lo menos tin un claridad total di DIMP, ta exigi e claridad ey por escrito, mas tarda awe diahuebs pa 3’or di atardi, sino ta tuma paso legal. Riba e mesun dia, DIMP lo a manda documentacion. E documentacion ey a bay pa ex formador, awor prome minister Mike Eman, cu na su turno a hiba esaki pa Gobernador di Aruba SE Alfonso Boekhoudt. E siguiente paso tabata pa Eman papia cu de Meza riba e asunto. Ora cu Noticiacla a puntras sr Eman ki dia e encuentro aki lo a bay tuma lugar, e mandatario no por a contesta esey concretamente. Diaranson e ora Noticiacla a tuma contacto cu e abogado, y e la haya duna e informacion menciona ariba. Pues, ta keda pendiente pa e informacion cu falta, y pa wak si e informacion e biaha aki si ta satisfactorio pa cliente di e abogado.