Gobierno venezolano ta exigi libertad di diplomatico Carvajal

ORANJESTAD –Gobierno venezolano ta exigi libertad inmediato di e diplomatico Hugo Carvajal, na gobierno di Reino Hulandes y ta rechasa su detencion. Mes momento tin un caso sumario diahuebs atardi na Aruba pa laga Carvajal den libertad mesora. Gobierno venezolano a haci un yamada fuerte segun e corant El Nacional, pa gobierno di Reino rectifica e hecho di ‘encarselacion inhusto’ di nan diplomatico. Si no haci esaki, e por danja relacion diplomatico, economico, energetico y comercial actual entre Aruba (Reino Hulandes) y Venezuela.

Momento cu gobierno di Venezuela a tende di e detencion, (cu nan ta yama illegal) atravez di e canciyeria, a activa tur mecanismo diplomatico pa coregi e loke nan ta yama ‘violacion di derecho internacional.’. Manera cu NoticiaCla a raporta caba, for di diahuebs mainta, un vice minister y otro diplomaticonan a yega Aruba pa pone nan mes na altura di e situacion actual di Carvajal.