Hulanda: Por poco guera cu Venezuela pa situacion Carvajal

DEN HAAG – Hulanda, por poco a haya su mes den un conflicto militar cu Venezuela, y cu Aruba mei mei di e conflicto. Esaki ta resulta di informacion cu awor a bira conoci (raportahe den Algemeen Dagblad na Hulanda) y a keda publica den prensa hulandes. Ta resulta cu enberdad bapornan di guera venezolano tabata a punto di drenta nos region, ora cu un oficial halto venezolano (Hugo Carvajal) a wordo deteni na Aruba. Esaki net ora cu Hulanda tabata atende e asunto tragico di buelo MH17 cu a cay. E situacion a pone e prome minister hulandes Mark Rutte, rabia formalmente y informa cu ‘nos no por tin dos crisis pareu’.

DETENCION CARVAJAL

Dia 24 di juli aña pasa, Aruba riba peticion di Merca, a detene e general Hugo Carnaval ora cu esaki a drenta Aruba. Venezuela a rabia formalmente y a pone Hulanda co-responsabel pa e situacion. Diplomaticamente, segun Venezuela, Carvajal tabata intocabel. A menasa mesora cu sancionnan diplomatico y comercial pa islanan ABC, di cual Aruba a sufri ciere di e espacio aereo pa algun ora.

POSIBEL INTERVENCION

Informacionnan cu a sali na cla awor, ta mustra cu cos por poco, a escala den un posibel intervencion cu tur su consecuencianan cu esaki por tabatin. Bapornan di guera venezolano cla pa sali pa nos islanan, a resulta awor di tabata berdad. “Aruba y Hulanda a spanta ora cu esaki a sosode. Aruba tabata papia di un menasa serio”.

HULANDA RABIA

Mientras cu Hulanda a ‘spanta’, nan a rabia tambe y mesora a duna minister encarga (Frans Timmermans) e ordo pa ‘regla’ e asunto, cu a conduci sorpresivamente den libertad di Carvajal. Aruba a considera esaki como un ‘vupa huridico y un buelta di gobierno hulandes” pero no tabatin alternativa sino di laga Carvajal bay.