Panamericano: Aruba di 6 lugar den landamento sincronisa

TORONTO- Despues di cu e ekipo di landamento sincronisa a logra nan clasificacion pa e Weganan Panamericano di Toronto a haci cierto ahustacionnan caminda algun atleta cu antes tabata forma parti di e ekipo a bin reforsa e ekipo despues di un proceso seleccion caminda un total di 16 atleta a participa na e esaki.

TEMPO DI ENTRENA

Mester bisa cu e grupo di atleta a bira uno mas experiencia aunke no tabata tin mucho tempo hunto ta entrena.  Despues cu diahuebs atardi a obtene un di seis luga den e rutina tecnico, diasabra merdia nos atletanan di landamento sincronisa mester a presenta e rutina liber dilanti di e huesnan.

RUTINA

Den e rutina di diasabra e landadonan a duna un presentacion aceptabel unda nan a logra haya un total di 72.7667. E puntuacion final a haya su merecido aplauso cerca esnan presente den e Centro Acuatico. Combersando cu e atleta Kiara van Trikt kende a forma parti di e ekipo, e la bisa nos cu riba e prome dia di rutina tecnico nan a luci basta nervioso paso con cu bay bini e Weganan Panamericano su nivel ta hopi halto y tur hende lo duna nan miho presentacion, claro cu esaki ta conta pa e ekipo di Aruba tambe, pues e presion tabata enorme. Pero den e landa di diasabra ya bo por a sinti e diferencia unda tur atleta tabata mas relaha, nan a sinti otro bon. Con cu bay bini e ekipo e entrena duro pa e weganan y pesey mes como ekipo nan kier a luci. Tur e lunanan di sacrificio pa loke ta e entrenamentonan a dunando su fruto, mientras awo mester sigui mehora pa e siguiente compromisonan.