Oduber: Gobierno anterior a haya conseho negativo pa RSG haya excepcion pa keda afo di LNT

ORANJESTAD – E hecho cu gabinete AVP-FUTURO ta evaluando pa pidi excepcion pa Royal Schiphol Group pa no cay bou di e ley di Landsverordening Normering Topsalaris (LNT), lo crea un precedente na Aruba. Asina ex minister di turismo y actual parlamentario Dangui Oduber a bisa Noticiacla. Contrario na esaki, riba pregunta di noticiacla, minister Geoffrey Wever, ta kere cu   cada caso ta uno riba nan mes, pues no ta pensa cu esaki lo crea un precedente. 

CONSEHO NEGATIVO

Noticiacla a haci e pregunta diahuebs na e minister actual Geoffrey Wever, cu si e hecho cu kier pidi excepcion pa Royal Schiphol Group (RSG), cu si esaki no ta crea un precedente, unda cu e ora tur otro departamento y compania cu ta cay bou di e ley aki, tambe lo pidi un ‘excepcion’. E mandatario a desmenti esaki. Mientrastanto, Oduber si ta pensa diferente. “Nos a splica nan (Royal Schiphol Group:red) cu si haci excepcion pa AAA cual nos tawata considerando pa haci, lo mester haci excpecion pa tur otro compania estatal” Oduber a bisa noticiacla. De echo, segun Oduber, conseho di minister anterior a pidi un conseho riba e tema aki, y e conseho aki a bin negativo, segun Oduber.