Agente policial a bay e ‘extra mile’ pa purba yuda turistanan hulandes den laman

Agente policial a bay e ‘extra mile’ pa purba yuda turistanan hulandes den laman

Posted on 04/11/2025 9:58 am AST | Updated on 04/11/2025 10:14 am AST

MACUARIMA – Un agente policial diahuebs a bay ‘the extra mile’, osea haci extra esfuerso pa yuda e dos turistanan hulandes cu a haya nan mes den problema den laman na Arashi diahuebs atardi. Un di e turistanan mientrastanto lamentablemente a fayece, cu ta e hulandes Dina Brouwer (52), mientras cu su ruman Wille Broekman ta hospitalia den situacion critico. 

E CASO

Tabata diahuebs atardi despues di 6’or Central di Polis a wordo notifica cu lo tin turistanan cu problema den lama na Arashi. Di biaha a despacha unidad di polis como tambe ambulance na e sitio di e sucedido.  Na yegada di e prome unidad di polis, e agente policial ta observa cu tin un grupo den lama ta hisando man y ta gritando pa yudansa. Sin duda agente policial a bay di biaha den accion y a drenta lama pa por bay brinda yudansa na e victima cu tabata tin mester di Polis.

HULANDES 

Manera cu Noticiacla a raporta caba den un articulo adhunto, ta trata di un grupo di turista nacionalidad hulandes. A bay lama y tabata snorkel y na dado momento un di nan a bira malo y no ta reacciona. Ta trata di e señora hulandes Brouwer. E agente en cuestion ta cuminsa na trece e señora canto y na mitar caminda ta topa cu un rubberboot di un compania local y nan na nan turno a yuda pone e victima den e boto hunto cu e Polis pa trece canto. 

 

E agente a keda duna e victima e prome auxilio (CPR) te ora nan a yega tera pa e prome unidad di ambulance presenta y a sigi cu e re-animacion.  

OTRO PROBLEMA

Un rato despues a avisa polis cu tin un otro persona den lama cu tambe tin problema den lama y tampoco no ta reacionando. E señora aki tambe lo ta hunto cu e famia di e victima cu a wordo hiba canto. A resulta cu esaki tabata ruman muher di e victima cu prome a wordo yuda. Un biaha mas esnan riba e rubberboot a duna un man y a yuda na busca y trece e otro señora.  

MAS UNIDAD

A pidi pa mas unidad di ambulance pa presenta y pa duna re-animacion pa e di dos victima. Despues di trabou duro, a bin logra haya pulso y asina stabilsa e di dos victima y transporte cu maximo urgencia pa hospital. 

E PROME VICTIMA 

Lamentamblemente no por a haci nada mas pa e prome victima. Dokter forensico a presenta na e sitio y ta constata morto di e señora di 52 aña naci na Urk, Hulanda. Noticiacla y Cuerpo Policial ta manda palabra di condolencia na famia di e fayecido. 

 

Na e sitio tambe a presenta departamento di slachtofferhulp pa brinda guia y yudansa na famia di e fayecido como tambe e otro victima.  Loke nos di Cuerpo Policial a haya como ultimo informe ta cu e señora ta den cuido intensivo. 

EXTRA MILE

 

Cuerpo policial a gradici y ta orguyoso di e agente policial cu a sa di bay e extra mile pa por a yuda dos victima. Su curashi y balentia ta trese cune  cu nos di Cuerpo Policial Aruba ta agradecido. Esaki ta un di e tareanan cu nos di KPA ta haci lo maximo esfuerso di guia nos agentenan pa brinda e mihor servicio tanto na nos comunidad pero tambe nos bishitantenan.

“ Masha danki pa bo esfuerso y nos ta sigur cu nos comunidad ta orguyoso di mira nos agentenan bay e extra mile den nan carera policial”.

  • Powered by SETAR