Kloosterziel (RSG): No tabata un condicion pa pone solamente un stranhero na cabez di AAA

ORANJESTAD –  Nunca e tabata un condicion pa pone solamente un persona stranhero na cabez di aeropuerto. E tema tabata debi cu lo tabatin den e contracto  cu Royal Schiphol Group (RSG) , mester a prepara un persona local como CEO durante e presencia di e grupo na Aruba, como parti di e contract. Pero despues di 20 aña ainda, RSG no a apunta un persona local. E ora noticiacla a pidi clarificacion cu si esaki kier men cu tabatin un acuerdo pa un CEO semper stranhero. E director encarga cu e parti aki, esta Kjell Kloosterziel a clarifica e ora pa noticiacla diahuebs atardi cu nunca esaki  tabata un condicion, esta pa pone un stranhero so na cabez. ino cu mas bien mester a djis presenta un persona capable di calidad halto CEO. “Y pa esey, nos ta scohe e miho persona cu nos por haya pa esey. A base di criteria obhetivo cu nos ta wak hunto cu RvC a stipula” Kloosterziel a bisa. Contestanto pregunta di otro medio, Kloosterziel a añadi cu loke tabata parti di e contracto ta, cu a haci asina yama ‘capacity building’, como parti di e contracto, cu ta ensera educa y guia talento local of di exterior, pa tin miho persona posibel trahando. 

DEN 20 AÑA NO A HAYA UN LOCAL?

Basa riba e contesta aki, noticiacla a puntra sr Kloosterziel si esaki kier men y of cu mester interpreta esaki cu durante 20 aña cu Schiphol Group a maneha aeropuerto, cu no a logra haya un arubiano ‘capable y di calidad halto’ pa bira CEO, Kloosterziel a bisa cu esey no ta su palabranan, esta cu no ta esey e la bisa. Pero pa clarifica, e la sigui bisa e despues cu tin hendenan sumamente capacita cu ta traha na aeropuerto, cu cual a traha hopi bon y cu sigur tin potencial pa den futuro por hunga un papel den esaki, esta pa bira CEO. Por compronde sinembargo, cu e local, den wowo di RSG, no tabata cla y capabel pa e funcion te ainda.