Celebrando e dedicacion di adultonan pa mas conocemento

ORANJESTAD - Un Renaissance Convention Center tabata testigo di un ceremonia yen di alegria pa adultonan cu a tuma e paso pa un miho futuro. Un total di 144 adulto determina a ricibi nan diploma despues di a completa exitosamente cursonan di Openbare Avondleergangen Aruba Beroepsonderwijs, OAA, of miho conoci como Scol di Anochi di Ofishi.

SCOL DI OFISHI

OAA no ta Enseñansa Pa Empleo, pero ta un Scol di Ofishi riba su mes, cu pa 60 aña ta percurando pa duna oportunidad na hopi Arubiano pa mehora nan abilidad y conocemento den un cantidad di areanan profesional, como tal dunando nan e posibilidad pa crece economicamente y profesionalmente. E aña aki un total di 144 persona a gradua for di e 15 cursonan cu OAA ta brinda, for di carpinteria basico te na mantencion tecnico y te hasta diseño di moda.

MINISTER

Minister di Enseñansa Michelle Hooyboer Winklaar a habri e celebracion. E Minister a felicita e grupo determina di graduadonan pa nan perseverancia y a homenagea OAA pa duna nan e oportunidad aki.

GRADUADONAN

Director di OAA Claudia Whitfield tambe honra e graduadonan, tur kendenan durante e curso di 60 aña a participa den e programanan. EL a bisa cu e institucion tin 60 aña ta trahando pa percura pa oportunidad di educacion pa personanan cu tin un trabou den dia. Y cu e ta algo dificil pa studiantenan combina e dos actividadnan aki. “E ta tuma hopi disciplina pa haci ambos exitosamente.” Reginald Havertong, Director Adhunto di OAA a reitera e dificultad pa traha den dia y atende scol di anochi, sea ta pa dos pa cuater biaha pa siman. “No ta facil pa traha y despues bin scol pa 2 anochi, 3 anochi of 4 anochi den siman pa seis luna, un of dos aña, lagando bo yiunan y casa na cas. Ademas mester traha huiswerk y studia den weekend. Nos di OAA beroepsonderwijs ta sumamente orguyoso di nos graduadonan.”

Havertong ademas a enfatisa e necesidad pa mas hende muhe participa den e programanan. Di e 144 graduadonan, 24 porshento tabata hende muhe. Y p’e, e cifra ey ainda ta mucho abou. E cursonan di OAA mester ta mas dirigi na hende muhe, den su opinion ya cu e probabilidad ta grandi cu un ser femenino educa ta percura pa su yiunan tambe haya bon educacion.

DOS PROGRAMA

Scol di Anochi di Ofishi ademas ta dirigi dos programa di MAVO, cu ta e asina yama Middag MAVO y Avond MAVO, cu ta permiti adultonan logra nan diploma pa sigui pa un educacion mas halto. Es mas, pa varios adulto hoben, e programanan aki di MAVO ta permiti nan traha y tambe sigui nan educacion.

MIHO GRADUADO

E miho graduadonan di e graduadonan di OAA 2015 ta Jo-Ann Jurica y Edward Joseph. Ambos a completa e Curso Basico di Tecnica di Auto. Y mientras cu kizas nan a haya atencion special pa nan logro, esnan cu a horta e show e anochi di graduacion tabata esnan cu a gradua di e curso di costureria, ya cu nan por a modela nan propio creacionnan.

CEREMONIA

E ceremonia di e aña aki tabata special mirando cu el a coincidi cu e di 60 aniversario di OAA. Ta trata di e programa educativo mas bieu di Aruba y tin plan pa expande e curiculo cu mas cu e 15 programanan existente.

HISTORIA OAA

OAA of miho conoci como Scol di Anochi di Ofishi a keda lanza riba 10 di Januari 1955, cu e obhetivo pa duna educacion profesional na e comunidad Arubano. E programa di scol di anochi ta uza e publicacionnan di EPB na Hato y San Nicolas. Pa mas informacion riba e cursonan, diploma y orario, por bishita e website www.oaa.aw of yama oficina na 5827324