Gobierno a inicia reunionan pa mantene servicio di Royal Schiphol Group na Aruba

ORANJESTAD – Gobierno a inicia reunionan pa logra mantene e servicionan di Royal Schiphol Group (RSG). Segun un comunicado digobierno, a informa cu e minister responsabel pa aeropuerto, mr. Wendrick Cicilia a convoca su prome reunion representando Gobierno como accionista mayoritario cu e Raad van Commissarissen (RvC) di Aruba Airport Authority N.V. como parti di un dialogo constructivo y orienta riba solucion duradero. Durante e reunion Minister Cicilia a tene un sesion cu Interim Management Team (IMT) pa haya un update di e situacion actual y ricibi varios opinion clave tocante disputa andando cu Royal Schiphol Group.

MANTENE Y FORTALECE RELACION CU RSG

Minister Cicilia a enfatisa cu e iniciativa aki ta forma parti di un vision strategico cu ta busca pa mantene y fortalece e relacion cu Royal Schiphol Group. E proyectonan andando manera Gateway 2030 tin un balor financiero considerabel y ta depende riba experticio y conocemento specialisa cu Schiphol Group ta ofrece. Segun e mandatario, Royal Schiphol Group como un lider mundial den maneho di aeropuerto tabata crucial den e supervision tecnico y experiencia desde e inicio di Gateway 2030 te na implementacion di fase 1A. Minister Cicilia a bisa di ta reconoce cu sin e apoyo constante y direccion tecnico di Schiphol, e proyecto por a enfrenta e retrasonan considerabel.

KEN TA BIRA CEO

Manera Noticiacla a raporta anteriormente caba, den un combersacion cu e COO di aeropuerto, Jürgen Benschop, e la confirma cu ta wardando riba e combersacionan aki pa sa kico ta bira e futuro di aeropuerto y consecuentemente e maneho di e aeropuerto cu pa 8 luna ta den man di 3 local, entre cual Benschop ta figura, aunke cu e tabata postula pa hopi aña pa bira e CEO local despues cu RSG keda cla cu e trabou.