Sneek: Parlamento a dicidi cu Otmar Oduber no por representa Parlamento den exterior

ORANJESTAD – Parlamentario Otmar Oduber (PPA) no por representa Aruba como parlamentario den exterior. Esaki pasobra e ta marca como sospechoso di husticia, pa Ministerio Publico. Asina e comision central di Parlamento a dicidi segun e presidente di Parlamento Marlon Sneek. Segun Sneek, a wanta na un decision di e coalicion di e tempo ey na 2019 cu a dicidi e tempo ey cu Benny Sevinger no por a biaha y representa Aruba debi cu e tabata marca como sospechoso di ley, pa Ministerio Publico. Segun Sneek, den un declaracion na 24ora.com, e situacion no ta diferente aki nan y como tal a mantene e mesun decision di biaha pasa. Si sr Oduber kier bringa e decision aki den corte, e ta liber pa haci tal y Parlamento lo respeta e decision cu surgi di e eventual caso ey. Mientrastanto, Oduber no por biaha pa IPKO na Hulanda proximamente y tampoco pa reunionan di Parlatino, cu mayoria biaha ta tuma lugar na Panama, cu ta e cede di Parlatino.

REACCION DI OTMAR ODUBER

Otmar Oduber den un reaccion pa Noticiacla a bisa esaki riba e prohibicion: “Ta anti-constitucional pero mas ainda un otro prueba cu esnan cu ta propaganda politica nobo ta mas anticua cu nunca”. Ademas, e la sigui bisa esaki. “AVP na 2019 a vota contra en proposicion e tempo ey paso a considere un persecucion politico contra Benny Sevinger y awe si na 2025 a vota na favor di dje, mientras cu Goffrey Wever den e comicion di huishoudelijke aangelegenheden 1 luna pasa a bisa cu e ta un acto anti-constitucional cu a tuma lugar na 2019, awe e “nobo” nan di FUTURO ta vota na favor di e acto anti-constitucional aki.” “Bo no por silencia e voz di PPA ni di Otmar Oduber, paso ta 3538 persona a vota pa PPA ta den parlamento”, e parlamentario a finalisando su comentario pa Noticiacla.