Kowloon Restaurant celebrando 40 aña cu su clientenan fiel

ORANJESTAD E siman aki ta habri cu un “family day” henter dia pa tur empleado di Kowloon Restaurant, relaciona cu celebracion di nan 40 aniversario. Consecuentemente, e restaurant ta cera riba dialuna 13 di juli henter dia. Pero desde dia 14 pa 19 di juli mesora ta start un siman di tarifanan reduci riba un cantidad di platonan, conoci pa su clientenan fiel.

CELEBRACION

Desde cu a cuminsa celebra 40 aña na inicio di luna di Juli, mesora a nota cu clientenan a yega na e restaurant pa saluda e empleadonan, probecha come e platonan conoci pa nan caba. Tur e clientenan tin un historia, mayoria bes un anecdota, den cual generacion tras di generacion ta comiendo eyden.

APERTURA

Tabata 40 aña pasa cu Neto Arends a habri Kowloon Restaurant y cu a sa di mantene un standard halto di calidad, di consistencia y di empleadonan contento di trayectoria largo den e compania. Nan conoce e clientenan di leu caba y cu un sonrisa ta sirbi nan platonan Chines, posiblemente esunnan mas gusta na Aruba.

FAMIA ARENDS

Kowloon Restaurant ta maneha dor di famia Arends y kende na Aruba no conoce Neto, Ludmila, Lisandra y Tirzah cu semper tabata e caranan di Kowloon, pero tambe trahadonan cu tin casi 40 aña di servicio manera Tommy, Frido, Erick, Nick, Rigo y otronan.

PREMIO

En conexion cu celebracion di nan 40 aña, Kowloon Restaurant ta ofrece e posibilidad na momento di take away of na momento di disfruta hunto cu bo famia y/o amistadnan un dushi cuminda, pa saca bo potret y pone esaki den un nice photoframe di Kowloon. Publik’e riba Facebook y tag Kowloon aden y esun cu haya mas like por gana Afls. 100,00 na Gift Certificate pa disfruta di un dushi cuminda na Kowloon Restaurant. Tur Dialuna lo saca e ganado cu mas “like” riba su potret.

Cada siman tin un menu special cu prijsnan reduci. Bishita e pagina di facebook di Kowloon Restaurant y sigui e actividadnan special durante e luna di fiesta aki. Keda pendiente pa e dia special mes cu ta Juli 28 cu ta e dia exacto cu Kowloon ta celebra su 40 aña di existencia.