Na Republica Dominicana cantidad di morto pa calamidad ta aumenta

SANTO DOMINGO - E cantidad di morto a subi na por lo menos 98 despues cu un club nocturno popular a basha den otro na Republica Dominicana, cu mas di 160 herido. Dialuna anochi e dak di e club den e capital Santo Domingo a basha abao. Tabatin un presentashon andando einan e tempo ey di e cantante di merengue Rubby Pérez. E ta un di e mortonan.

No ta cla cuanto hende tabata paden ora cos a bay robez. Trahadonan di rescate ainda ta buscando hende bou di e escombronan.

VICTIMANAN PROMINENTE

Entre e mortonan tin dos ex hungador di baseball: Octavio Dotel y Tony Blanco. Dotel a hunga pa diestres club di MLB na Merca y Canada for di 1999 padilanti y a gana e campeonato cu St. Louis Cardinals na 2011. Despues su nòmber a bini dilanti den un investigashon riba trafico di droga y labamento di placa. Blanco tambe a hunga na Merca y tabatin un carera largo na Hapon.

Un otro víctima di alto profil ta Nelsy Cruz, e gobernador di un provinsia Dominicano y ruman muhe di MLB All-Star Nelson Cruz. Inmediatamente despues di e desaster, e la yama presidente Abinader y a bisa cu e la keda atrapá. E señora di Abinader a conta e periodistanan emocionalmente tocante e yamada di telefon. Cruz a fayece den hospital.