Szabó no kier hala deadline di 1 di mei pa entrega concepto di Rijkswet nobo di RAFt

ORANJESTAD – Secretario di estado Hulandes pa e.o. Asuntonan di Reino Zsolt Szabó ta sigui para riba su punto, y no kier cambia su pensamento pa cambia e deadline di 1 di mei, riba cual tanto Hulanda como Aruba mester entrega e concepto di ley di Reino riba supervision financiero na tanto Parlamento y Tweede Kamer. Esaki e la bolbe bisa Noticiacla diamars durante un entrevista cortico di su bishita na Aruba. “Manera mi a bisa semper, nos a traha un palabracion aña pasa, den un acuerdo di gobernacion, cu 1 mei (2025) ta e fecha” e mandatario a bisa. “E fecha tey ainda y pa loke ta trata ami, e fecha ey no ta bay cambia” e mandatario Hulandes a bisa explicitamente. 

TARDANSA

E pregunta cu Tito Laclé a haci e mandatario, ta basa riba e echo cu ainda Raad van State no a haya e ley pa analisa y conseha ariba, (te cu siman pasa ainda) y cu esaki ta tuma por lo menos 2 pa 3 luna pa nan haci nan trabou, esta Raad van State. Pues lo ta entregando un ley di Reino, sin e conseho importante aki. Algo cu no ta usual. Ademas, e gabinete AVP-FUTURO a caba sinta apenas un siman, y Parlamento no a toca e tema concretamente te pa bay fiha e puntonan di cambio. Teniendo tur esaki na cuenta, ta puntra si ainda ta logico cu por ‘logra’ e fecha ey di 1 di mei. CONSECUENCIAE consecuencia si no logra e fecha ey, ta nifica cu segun palabracion, e tasa di interes ta bolbe subi pa loke ta e debe di Covid, na September proximo, ora cu tin cu haci otro pago. Y esey ta pone cu Aruba tin cu bay paga basta mas placa na interes, cu ta placa cu e por a scapa y usa pa otro metanan. No ta conoci cu na caminda, si logra, toch por ‘tira awa den biña’ y logra convence Hulanda pa atende cu e asunto aki den beneficio pa Aruba. Na mei, e mandatario ta bek, y e ora lo por trata e tema aki.