KPA: Cambio na salida y entrada di waf na Playa

ORANJESTAD -En conexion cu construccion di e Welcome Plaza y e entrada/salida pa waf nobo cu ta bay man-den-man den crea un waf dedica na turismo, Cuerpo Policial, DTP (Departamento di Transporte Publico), ATA (Aruba Tourism Authority y APA (Aruba Ports Authority) a traha hunto pa crea un entrada/salida alternativo pa usuarionan di waf. Ademas a re-ubica e parkeo pa servicionan y productonan relaciona na transportacion di e turistanan y tripulacion cu ta bishita Aruba riba barconan crucero, esta taxi, auto di huur, tourbus, etc.

GATE 4

Unda cu antes semper a uza “Gate 4” como entrada/salida, actualmente ta uzando “Gate 1” pa personanan na pia y “Gate 2” pa vehiculonan. A haci un cantidad grandi di cambio ademas den e parkeo pa asina acomoda tur servicio y tambe a crea un espacio unda nan por ofrece nan productonan na un forma miho organisa.

PARKEO

Mester a haci hopi cambio, hunto cu DOW (Dienst Openbare Werken) den forma di señalnan pinta riba caminda y den e area di parkeo, pero awo cu tur cos ta cla tur usuario local a keda satisfecho. E salida/entrada anterior, cu tanto construccion andando, tabata causante di un situacion un caotico.

CAMBIONAN BON

Pero awo, segun Marlon Vrolijk di "One Happy Island Tours and Transfers" ta expresa, despues di sufri pa dos luna cu e situacion ey, e no tin nada di keha, pasobra e cambionan ta hopi bon. El a expresa cu tur cos awo ta bon organisa, e ta un alivio pa nan y cu nan tur miho den bista di turismo ta yuda tambe pa nan servicionan haya bida.

TAREA PRINCIPAL

Rolando Maduro, kende tabata “teamleider” pa Cuerpo Policial pa cu e proyecto aki y ta encabesa tambe e seccion di Visibility Team di Oranjestad, a bisa cu nan tarea principal awo ta pa mantene ordo publico. El a splica cu hopi biaha e turista tabata wordo confronta pa e “hustling” entre e bendedonan di tours y cu nan presencia ta yuda minimalisa esey. Tambe e forma cu e structura a wordo cambia y e forma cu e turistanan ta sali for di waf awo ta yuda hopi.

TEMPO DI TRABOU

Polis Rolando Maduro a agrega cu e restructuracion di e entrada/salida y cambionan lo keda cla den e proximo tres lunanan y lo atrobe haci un otro cambio pa acomoda tur cos rond di e Welcome Plaza.

MIHO VISIBILIDAD

Di parti di Departamento di Transporte Publico, Belinda Maduro di e seccion di “Inspectie” a bisa cu awo tin miho visibilidad pa e turistanan riba unda nan mester cana y riba tur e productonan y servicionan cu Aruba ta ofrece na nan. A splica cu ora cu e construccion ta cla, lo e entrada/salida move bek pabao unda cu awo Maritieme Politie tin nan facilidadnan y e servicionan di transporte publico lo wordo ubica un un poco mas pabao di Valero Boulevard. Cu e situacion temporal actual, segun Belinda Maduro, e trafico no lo bay tranca mas y tambe e negoshinan den Weststraat ta goza tambe di mas clientenan potencial pasando den e area.