KIA ta haya management team nobo

ORANJESTAD - A start proceso pa yega na un Management Team nobo pa KIA. Manera ta conoci, for di momento cu a bira conoci cu e director di KIA a tuma su retiro, mesora minister di husticia Arthur Dowers tabata den contacto cu e top funcionarionan di e instituto coreccional, pa sigura continuacion di maneho. Nan a garantisa cu e maneho ta continua sin problema y a base di esey mes e mandatario a bishita e team di maneho siman pasa. E mandatario a bishita KIA un dia despues caba.

COMBERSACION

"E combersacion a bay bon. Nos a haya hopi oportunidad pa intercambia di diferente punto y pa por garantisa cu e maneho ta sigui", asina Dowers a duna di conoce na su salida for di KIA. El a enfatisa cu tabatin algun decision den e maneho anterior cu trahadonan no a keda contento cu nan y cu el a opta pa pidi e director pa wanta cu nan, pero tabatin decisionnan tambe cu aunke e trahadonan no tabata contento, cu e mes como mandatario a reenforsa cerca e director saliente. Anto ta specialmente e decisionnan ey e kier a sigura cu nan lo sigui sin adaptacion.

GARANTIA

"Mi a haya garantia cu e grupo aki lo sigui cu maneho di e organisacion bou liderazgo di e top funcionarionan y cu nan lo haci tur nan esfuerso pa tur hende duna di nan parti pa garantisa siguridad y trankilidad", asina Minister Dowers a splica.

RETONAN

Mas leu, den un tono mas serio, el a enfatisa cu "Un prizon, manera mi a bisa na varios ocasion, cu tin su retonan grandi. E no ta un organisacion facil pa maneha, pero mi ta kere si cu nos tin suficiente hende di experencia cu por garantisa e maneho diario y continuo na un nivel mas basico den e organisacion".

STRATEGIA

Pa loke ta trata e maneho na un nivel mas strategico y tactico, lo mester establece un directiva pa e organisacion. Y esey ta un trayecto cu a start mesora. Na e momento aki e mandatario ta na mesa cu varios persona, posibel candidatonan, pa asina dicidi con lo sigui cu maneho di KIA. Tambe a acerca un ex-miembro di staff di KIA, cu entretanto a baha cu pensioen, pa si e lo por asisti den e proceso, debi na su conocemento y experencia, y el a acepta di asumi un responsabilidad di yuda canalisa e proceso pa yega na un "management" nobo pa Instituto Coreccional Aruba, KIA.