Szabó: Hulanda no ta dispuesto pa cambia e acuerdo actual cu Aruba riba supervision financiero

DEN HAAG – Hulanda no ta disponible pa cera otro acuerdo (nobo) cu Aruba pa loke ta e ley pa supervision financiero. “Di parti di Hulanda, mi no ta mira e motibo y ta pensa cu di ningun manera mester yega na otro acuerdo. Mi ta kere cu nos mester sigui riba e caminda cu nos a cana hunto (caba)”. Esaki tabata e contesta di secretario di estado pa Asuntonan di Reino, Zsolt Szabó diabierna mainta na Noticiacla. Esaki basa riba e punto cu un di e partidonan di coalicion di gabinete AVP-FUTURO, esta AVP, tabata kier a cambia esaki y a vocifera esaki durante campaña electoral. Partido FUTURO si a mustra cu e tabata ok cu e concepto actual cu tin riba mesa, pa loke ta e ley di supervision financiero pa Aruba. Otro siman e mandatario ta na Aruba y lo topa premier Mike Eman y lo sigur atende esaki cu e mandatario e ora ey como un di e puntonan di discusion. 

ESPACIO PA CAMBIO?

Basa riba esaki, a puntra e mandatario si tin espacio pa cambio ainda mas ainda, cuanto espacio tin pa traha acuerdonan nobo riba ehecucion di e proposicion nobo pa e Ley di Supervicion Financiero Nacional. E mandatario recorda cu e acuerdo actual cu tin, no tin ni un aña ainda, esta esun cera na mei di 2024. E mandatario hulandes a sigui referi na e acuerdo cu tin aworaki, of e proposicion cu tin riba mesa, cu ta e proposicion pa e ley hybride, esta cu ta un mitar landsverordening y mitar rijkswet. E mandatario como tal, tabata determina y a bisa cu mester djis sigui cu loke tin awor y cu Hulanda no ta dispuesto pa yega na otro acuerdo awor.