Caso di cacho crioyo di Aruba den corte na Merca

ATTLEBORO – E caso den corte na Merca pa bringa pa un cacho crioyo di Aruba, a tuma lugar ayera. E caso ta referi na un situacion unda cu un pareha mericano a ‘haya’ e cacho aki den un supuesto estado deplorabel, y a trece Merca bek. E doñonan original ta bringa e caso, argumentando cu e pareha mericano a ‘horta’ e cacho. E doñonan na Aruba, -Cornelia Hajdinyak y Howard Tromb-, a demanda e pareha mericano. Un huez mericano tin cu dicidi e destino di e cacho awor.

CASO MERCA

E caso, den un corte mericano na North Attelboro, a tuma lugar diahuebs, unda cu abogado pa e doñonan na Aruba Keith Langer, a califica e situacion simplemente como un ‘robo di un cacho. Nada mas’.

DEFENSA

Pero abogado di Boston, Alfred Gray, cu ta representa e pareha O’Connel, ta argumenta cu e propiedad, of doño di cacho mester wordo estableci. Y e argumento principal ta cu, si e doñonan por determina mes cu ta nan cacho, nan a ‘perde’ derecho di ta doño, debi na e supuesto maltrato di e cacho. Ambos abogado ta considera esaki un caso legal serio, cu ta ensera un amor emocional pa e cacho, -di ambos ‘doño’-, y un inversion financiero den asuntonan legal, recibo di veterinario y pasashi di avion. E caso mes a dura 4 ora, cu testimonio door di 5 testigo, incluyendo lagrima di e yiunan di Tromb, cu a nota cu e chens pa wak e cacho bek, lo no materialisa. Tromb a testigua cu “Whitey” a perde riba 27 di october di 2014. Nan a caba sterilisa e cacho, y despues a rekeri dos operacion mas despues, cu a costa mas di $2,000.00. Hajdinyak, e otro doño na Aruba, a bisa cu e la busca e cacho, y despues a bin compronde cu e la wordo hiba Merca. “Pero ningun hende kier a dune otro informacion. E la identifica e cacho via un potret y a mira cu e tabatin e mesun cicatriz cu “Whitey”.E la duna su informacion na un voluntario di Animal Relief Foundation, y e prome siman di november, a ricibi un mail di Lisa O’Connell. Hajdinyak a bisa O’Connell cu e tabata kier e cacho bek, y a ofrece pa paga e gastonan, y adicionalmente ofreciendo pa duna nan un otro cacho di shelter.

E pareha na Merca, a duna nan testimonio detaya di con nan a haya e cacho, na unda, y tur loke nan a haci cune prome cu a trece Merca. “Mi no a horta e cacho. Mi a haye na beach. Mi ta sinti cu e ta corectamente dimi, y e ta stima mi” O’Connell a bisa. E caso, presidi pa huez Edmund Mathers, lo continua dia 31 di juli. O’Connell lo wordo cuestiona ora cu e caso continua.