Eman: Mester a sacrifica Koninkrijksrelaties pa logra un coalicion cu FUTURO

ORANJESTAD – Sacrifica e tema di Relacion di Reino, tabata e momento mas dificil di e negosacion durante formacion di e coalicion AVP-FUTURO segun prome minister Mike Eman. Asina e la confesa den e programa Noticiacla LIVE diamars anochi, ora cu e moderador Tito Laclé a puntra, si durante e 68 dianan di negosacion, e la pensa un momento cu na lo no a sali afo. Ademas, Eman a confesa cu e tabata un experiencia nobo, trata cu un partner di coalicion ya cu den su dos termino anterior como premier, e no mester a negosha cu un partner di coalicion

COALICION

E prome asunto di negosacion tabata ‘ un experiencia nobo’ caba, manera sr Eman mes a bisa, mirando cu tanto na 2009 como 2013 ora cu e la gana eleccion cu 12 y 13 asiento respectivamente, y awor e la haye pa prome biaha cu un coalicion. Algo cu e no tabatin experiencia cu ne. E la conta di un anecdota personal emocional ora cu  durante e proceso, su ruman mayo tabata hopi malo y despues a bin fayece. “Cierto momento mi a bis’e, Henny bo tin cu lanta pasobra ami no tin experiencia cu coalicion! Abo a forma tres coalicion!” Eman a bisa, cu e intencion pa duna su ruman mayo animo pa bira miho, pero esaki no a yuda. E la mustra tambe cu tabata enberdad un reto pa forma un coalicion pero e ta kere cu a logra si. A papia hopi cu otro, dialoga pa gana confiansa cu otro, cu tabata importante pa yega na un coalicion duradero. “E animo ta hopi halto y e confiansa mutuo tambe ta hopi halto!”. 

SACRIFICA SU BABY ‘KONINKRIJKSRELATIES’

Un otro cos cu Eman a confesa na Laclé, ta e hecho cu e mester a ‘sacrifica’ su baby, esta e tema di Koninkrijksrelaties, y duna esaki na e otro partido, mientras cu e mes tabata kier e. Esaki tabata e contesta na Lacle, riba e pregunta si Eman a kere cu durante negosacion tabatin momento cu e la kere cu e lo no a logra. “Tabatin momentonan cu nos a sinti cu toch e por ta basta dificil” Eman a cuminsa bisa. “Mi ta hopi franco, por ehempel partido FUTURO a pidi koninkrijksrelaties. E tabata manera un dart den mi curason den mi curazon, pasobra e ta un tema cu mi a carga cu hopi passion semper” Eman a sigui bisa. “Semper mi a considere practicamente mi baby, pa manage e tema aki!” E tabata kier a termina e loke e la cuminsa den e prome dos terminonan como prome minister, y kier a termina esaki awor. “E tabata momento toch pa haci evaluacion, kico ta mas importante, y cu e tema cu letterlijk lo bo prefera di tin, of pa Aruba yega na un gobernacion cu e meta mas grandi, envez di loke ami of abo kier. Asina a supera e momento ey cu tabatin temanan cu nos tur dos tabata hopi dirigi ariba dje”. Loke pa Eman a pisa tambe, e la sigui bisa, ta cu pa supera e momento ey, e tabata kier pa tin un coalicion cu tur partnernan tabata contento. “Bo por tin un coalicion cu ta gana e negosacion pero si finalmente e acuerdo cu bo logra, no ta abase di uno ta keda hopi menos contento, e ta bay haal bo in na caminda. “Dus a haci e offer ey pa e long term pa e compromiso di tur dos partido, na e meta mas grandi. Y a supera e pida ey y no tabatin otro momento echt cu a coalicion no tabata parse visible”, Eman a bisa finalmente. Pa wak e entrevista completo, please click AKI.