Delegacion di Formula 1 ta na Aruba pa wak tereno di refineria pa un pista di Grand Prix

ORANJESTAD – Un delegacion di e organisacion di careda professional Formula 1 (F1), ta programa pa bin Aruba proximamente, cu e intencion pa bishita e tereno actual di refineria y e area rond di Palo Marga. Nan lo ta interesa den converti e tereno actual di refineria na San Nicolas, den un pista pa careda F1 (Grand Prix). Banda di e tereno di refineria, nan ta mirando tambe e area di Palo Marga y cercania. E intencion ta pa logra keda cla pa na 2027, añadi Aruba riba e calendar annual di F1, reemplasando Zandvoort cu ta tene su ultimo careda na 2026.

TERENO PERFECTO

A compronde cu e tereno di refineria ta uno perfecto, unda cu por resolve un asunto actual cu e tereno no ta apto pa mucho cos, manera vivienda y otro posibilidad. E ta resolve e asunto unda cu un instancia ta tuma e gasto riba dje pa resolve esey sin gasto pa Aruba. A cambio, Aruba ta haya un otro entrada annual cu por yuda e caha di gobierno. A compronde cu anualmente un careda asina ta genera por lo menos 150 miyon dollar pa e isla. Fuera di esey, e ta trece reconocemento internacional pa Aruba riba un tereno otro, den circulo di un grupo financiero potencial. 

HULANDA VS ARUBA

Anualmente riba e calendar di F1, tin como 24 careda, reparti riba henter mundo literalmente, di cual Hulanda tambe ta aparece. Pero entrante 2027, Hulanda no ta organisa esaki mas y e ora ta pensando pa un otro lugar reemplasa e destinacion ey. Y mirando cu Aruba ta un isla cu vinculo hulandes, y cu un fanaticada grandi pa e coredor Hulandes Max Verstappen, esaki ta un atraccion local tambe. Cada careda ta garantisa miles di persona vincula directamente cu e careda, unda cu tin 10 ekipo (pronto 11) cu dos coredo y miles di trahado como sosten, y tur tin cu biaha pa Aruba. Teniendo tur esey na cuenta, y cu Aruba riba e calendar, e ta bira un garantia cu pa un siman, e ta genera no solamente hopi trafico extra, sino un sin fin di publicidad extra cu normalmente lo ta impagable.  

PALO MARGA

E otro alternativa, ta e pista y area rond di Palo Marga, unda cu tin tereno suficiente tambe, cu por haci’e parti di e experiencia di careda di auto, sin cu e tin cu mishi cu e concepto di Palo Marga, y ta traha e pista rond di Palo Marga, y asina engrandece solamente e experiencia di auto di careda na Aruba. 

RACETRACK ANTERIOR

E diferencia cu e idea anterior di bin cu un racetrack, tabata cu e fin tabata pa un otro tipo di careda di auto, menos popular internacionalmente, y mas enfoca riba tipo di auto diferente cu ta mas popular na Merca so. E biaha aki, e beneficio di e pista aki, ta no solamente pa San Nicolas, sino pa Aruba completo. 

INTERNACIONAL 

Cu e caredanan di Formula 1, e ta haya un tinte mucho mas internacional. No ta conoci kico ta pasa cu e bishita di e delegacion y ni ki decision lo cay, pero e solo hecho cu e organisacion tin Aruba riba su bista, sigur ta un punto hopi positivo, informantenan a bisa nos.