Banco Central di Aruba a tene evento “BAN TOPA” na Hulanda pa recluta trahador

ORANJESTAD/ AMSTERDAM - Banco Central di Aruba a tene evento “BAN TOPA” na Hulanda pa recluta trahador. Ambos evento di “Ban Topa”, teni riba 26 & 27 di maart 2025, na Amsterdam y Rotterdam, respectivamente, tabata un exito segun e banco, treciendo hunto studiantenan y (hoben) profesionalnan ansioso pa topa cu Banco Central di Aruba (CBA).

“Como un institucion lider den comunidad di Aruba, nos ta wordo impacta door di e scarsedad di talento den nos mercado laboral. P’esei pa atraé talentonan bèk na Aruba, ta importante pa duna informacion di prome man tocante oportunidadnan di trabou potencial na CBA” e banco a sigui bisa. E eventonan di “Ban Topa” na Hulanda ta e prome paso den un esfuerso continuo pa keda conecta cu studiantenan y profesionalnan (hoben) cu ta biba den exterior, fomentando relacionnan manteniendo nan bon informa. “Nos a papia tambe di nan retonan yasuntunan, pa posiblemente haña solucionnan apropia. "Nos tabatin e privilegio di conecta cu cada participante durante e eventonan di “Ban Topa” y a sinti nan entusiasmo pa topa nos team, siña mas tocante e rol di CBA, y otro desaroyonan importante den e comunidad di Aruba. Nos a comparti informacion tocante posibilidadnan di pasantia, e vacaturanan actual, beneficionan di empleado, y e proceso di reclutamento. Nos ta kere firmemente cu e iniciativa aki a cuminsa bon, e biahe a cuminsa bon kizas trahando tambe hunto cu otro stakeholdernan local, pa inspira y atrae graduadonan y profesionalnan trahando pa bin bek Aruba, pa forma parti di e forza laboral local, y contribui impactantemente na e bienestar di e comunidad di Aruba”.